مامۆستا عەلی باپیر: شەڕی لافاوی ئەقسا کۆتایی پێنەهاتووە

پەیام

ئیسطه‌نبول.. مامۆستا عەلی باپیر بەشداری لە دیداری دەوری هەماهەنگی دامەزراوەکانی زانایانی ئوممەتدا کردوو وتەیەکی پێشکەش کردوو رایگەیاند: شەڕی لافاوی ئەقسا کۆتایی پێنەهاتووە، بەڵکوو ئەم جەنگە درێژەی دەبێت و تاوەکوو کێشەی فەلەستین و ئەقسا بەتەواوی چارەسەر نەبێت

 کورتەی وتاری مامۆستا عەلی باپیر:

مامۆستا عەلی باپیر، سەرۆکی کۆمەڵی دادگەریی کوردستان، بەشداریی لە دیداری دەوری هەماهەنگی دامەزراوەکانی زانایانی ئوممەتدا کرد، کە لە لایەن هەماهەنگی زانایانی پێشەوا بۆ سەرخستنی قودس و فەلەستین ڕێک خرابوو.
لەم کۆبوونەوە گرنگەدا، مامۆستا عەلی باپیر گوتارێکی فرەڕەهەندی پێشکەش کرد.

تەوەرە سەرەکییەکانی گوتارەکە:

•⁠⁠فەلەستین و قودس: پرسێکی جیهانیی ئیسلامیی: مامۆستا عەلی باپیر جەختی لەسەر ئەوە کردەوە کە پرسی فەلەستین و ئازادکردنی قودس، پرسێکی تایبەت نییە بە نەتەوەی عەرەب یان فەلەستینییەکان بەتەنیا، بەڵکوو پرسێکی پەیوەست و چارەنووسسازە بۆ تەواوی موسڵمانانی جیهان.

•⁠⁠تۆفانی ئەقسا: پێوەرێک بۆ موسڵمانانی ڕاستەقینە: وەک خاڵێکی وەرچەرخان، "تۆفانی ئەقسا" و جەنگی سەر غەززە، بوونەتە پێوەرێکی یەکلاکەرەوە بۆ ناسینەوەی مسوڵمانانی ڕاستەقینە، نەک تەنها لە فەلەستین، بەڵکوو لە سەرانسەری جیهانی ئیسلامیدا.

•⁠⁠زیندووکردنەوەی قەزیەی فەلەستین: "تۆفانی ئەقسا" بووە هۆی زیندووکردنەوە و گەڕاندنەوەی قەزیەی فەلەستین بۆ پێشەوەی بابەتە گەرمەکانی ڕۆژ.

•⁠⁠سەربەرزیی موجاهیدان و دانیشتووانی غەززە: موجاهیدانی غەززە و دانیشتووانە خۆڕاگرەکەی، بە ئازایەتی و قوربانیدانی بێوێنەیان، سەری ئوممەتی ئیسلامییان بەرز کردووەتەوە. ئەوان مافێکی گەورەیان بەسەر کۆی موسڵمانانی جیهانەوە هەیە کە پشتیوانییان لێ بکەن و هاوکارییان بن.

•⁠⁠لێکەوتەکانی جەنگی لافاوی ئەقسا: شەڕی لافاوی ئەقسا کۆتایی پێنەهاتووە، بەڵکوو ئەم جەنگە درێژەی دەبێت و تاوەکوو کێشەی فەلەستین و ئەقسا بەتەواوی چارەسەر نەبێت، کۆتایی نایەت. پشتیوان بە خوای بەرز، ئەو ڕۆژە نزیکە.

•⁠⁠ئیدانەکردنی کۆمەڵکوژیی سودان: مامۆستا عەلی باپیر بەتوندی ئیدانەی ئەو کۆمەڵکوژییانەی کرد کە لە ئێستادا دەرهەق بە خەڵکی بێتاوانی سودان ئەنجام دەدرێن. بێدەنگیی ڕێکخراوی نەتەوە یەکگرتووەکان و وڵاتانی ڕۆژئاوا لەم بارەیەوە، جێگەی پرسیار و گومانە.

•⁠⁠بانگەواز بۆ ئاشتی و یەکگرتوویی لە سووریا: داوای لە کورد و عەرەب لە سووریا و سەرجەم نەتەوە مسوڵمانەکانی دیکە کرد کە کار بۆ ئاشتی، لێکتێگەیشتن و یەکگرتن لەسەر خاڵە هاوبەشەکان بکەن، خۆشیان بەدوور بگرن لە داخراویی و دەمارگیریی و کاریگەر بوون بە ئەجێندا دەرەکییە نەرێنییەکان