حەماس داوا لە نێوەندگیران دەكات دژی پێشێلكارییەكانی قەوارەی زایۆنی هەڵوێست بنوێنن

پەیام

بزووتنەوەی حەماس داوای لە نێوەندگیران و وڵاتانی گرەنتیكاری ڕێككەوتنی ئاگربەستی كەرتی غەززە كرد بە جددی هەڵوێست بۆ ڕاگرتنی پێشێلكارییەكانی قەوارەی زایۆنی وەربگرن.

لە ڕاگەیەنراوێكدا لەژێر ناوی حازم قاسمی وتەبێژی، بزووتنەوەی حەماس دەڵێت: سوپای داگیركەری زایۆنی تاوانبار شەوی ڕابردوو بۆردومانی كەرتی غەززەی لە وشكانی و دەریا و ئاسمانەوە چڕ كردەوە و وەك بەردەوامییدان بە دەستدرێژییەكانیشی بەردەوامیی بە تەقاندنەوەی خانوو و باڵەخانەكان دا.
وتیشی: داگیركەری تاوانبار ئەمڕۆ دوو منداڵی كوشتووە، ئەمەش جارێكی دیكە جەخت لەوە دەكاتەوە كە جەنگی قڕكردن دژی دانیشتوانی كەرتی غەززە بەردەوامە و هێرش و پەلامار ڕانەوەستاوە، بەڵكو تەنیا شێوازەكەی گۆڕاوە.

هاوكات بزووتنەوەی حەماس داوای لە نێوەندگیران (میسر و قەتەر) و وڵاتانی گرەنتیكار و ئەو لایەنانە كرد كە لە شەرم شێخ كۆ بوونەوە، بە جددی كار بۆ ڕاگرتنی پێشێلكارییەكانی داگیركەر و پابەندكردنی بە بەڵێنەكانی بەو جۆرەی لە ڕێككەوتنەكەدا هاتووە، بكەن.

لە 10ی مانگی ڕابردووەوە كە ڕێككەوتنی ئاگربەست كەوتووەتە بواری جێبەجێكردەنەوە سوپای قەوارەی زایۆنی نزیكەی 497 پێشێلكاری ئەنجام داوە و لەو میانەیەشدا زیاتر لە 342 فەڵەستینی شەهید بوون.