1 کاتژمێر پێش ئێستا
56 جار خوێنراوەتەوە
پاكستان ئامادەکاری بۆ میوانداری گەڕی نوێی دانوستانەكانی ئێران و ئەمریكا دەکات
پەیام
پاكستان هیوای خواست بەمزووانە وڵاتەكەی میوانداری گەڕی نوێی دانوستانەكانی نێوان ئێران و ئەمریكا بكات، سەرۆكی ئەمریكاش دەڵێت: لەسەر زۆربەی خاڵەكانی پێشنیازە نوێیەكە ڕێك كەوتوون.
شەهباز شەریف، سەرۆكوەزیرانی پاكستان ڕایگەیاند: پاكستان هەموو هەوڵێك بۆ چەسپاندنی ئاشتی دەدات.
لە نووسینێكیدا لە تۆڕی ئێكس، سەرۆكوەزیرانی پاكستان هیواشی خواست كە لە كاتێكی زۆر نزیكدا لە ئیسلاماباد میوانداری گەڕێكی دیكەی گفتوگۆكان بكەن.
ناوبراو ئەوەشی ئاشكرا كرد عاسم مونیر، فەرماندەی سوپای پاكستان، وەك نوێنەری سەرەكیی وڵاتەكە لە پەیوەندییە تەلەفۆنییەكەی سەرۆكی ئەمریكا لەگەڵ سەركردەكانی ناوچەكەدا بەشدار بووە.
لای خۆیەوە، دۆناڵد ترەمپ، سەرۆكی ئەمریكا ڕایگەیاند: زۆربەی بەندەكانی ڕێككەوتنەكە لەگەڵ ئێران و وڵاتانی ناوچەكە یەكلا كراونەتەوە و تەنیا هەندێك ڕێكاری كۆتایی ماون.
ترەمپ ئاماژەی بەوە كرد، كە ڕێككەوتنەكە كردنەوەی گەرووی هورمز و چەند بابەتی دیكە لەخۆ دەگرێت.
ئەوە لە كاتێكدایە كە ئاژانسی "فارس" ی ئێرانی دەڵێت گەرووەكە هەر لەژێر ئیدارەی تاراندا دەمێنێتەوە.
هاوكات بەپێی زانیارییەكانی ڕۆژنامەی "فاینانشال تایمز"ی بەریتانی و سەرچاوە دیپلۆماسییەكان، پێشنیازەكەی پاكستان درێژكردنەوەی ئاگربەست بۆ ماوەی 60 ڕۆژی یكە لەخۆ دەگرێت تاوەكو زەمینە بۆ گفتوگۆ ئەتۆمییەكان خۆش بكرێت.
لە تۆڕە کۆمەڵایەتیەکان شەیری بکە