ئێران: لە بەرانبەر فشارەکاندا هێز و تواناى خۆمان نیشانداوە

پەیام

سوپای پاسدارانی ئێران هۆشداریی لە هەر هێرشێكی نوێ بۆ سەر وڵاتەكەی دەدا و ڕاشیدەگەیەنێت لە بەرانبەر ئەو فشارانەى کراوەتە سەر وڵاتەکەیان هێز و تواناى خۆیان نیشانداوە.

سوپای پاسدارانی ئێران بەبۆنەی ساڵیادی ڕزگاركردنی شاری خوڕەمشار، ڕایگەیاند: گەلی وشیاری ئێران تەنانەت لە پڕۆسەی دانوستانەكانیشدا ڕێگری لە سەركەوتنی پلانەكانی دوژمن دەكەن. 

لە ڕاگەیەنراوێكدا لەوبارەوە، سوپای پاسداران ئاماژەی بە گفتوگۆ بەردەوامەكان لەگەڵ ئەمریكا كردووە و جەختی كردووەتەوە "هێزە چەكدارەكان بە پشتیوانی گەل، نەیانهێشتووە لایەنی بەرانبەر بگاتە ئامانجە سیاسی و سەربازییەكانی خۆی لە قۆناغە جیاوازەكاندا. 

هەروەها ڕایگەیاند: پێشكەوتنەكانی ئێران لە بوارە ئەتۆمی و مووشەكییەكاندا بووەتە هۆی ئەوەی ئەمریكا و ئیسرائیل دووبارە پێداچوونەوە بۆ لێكدانەوە و پلانەكانیان بكەنەوە.

ڕایشیگەیاند: ئەمەش نیشانەی هێز و توانای ڕووبەڕووبوونەوەی ئێرانە لە ئاستی نێودەوڵەتیدا بەرانبەر فشارەكان.

لە كۆتایی ڕاگەیەنراوەكەدا سوپای پاسدارانی ئێران ئاماژەی بەوە داوە "هەموو یەكە سەربازییەكانی ئێران لە بەرزترین ئاستی ئامادەییدان، هەر هێرشێكی نوێش بۆ سەر خاكی ئێران، جەنگەكە فراوانتر دەكات و دەرەنجامی وێرانكەری لێ دەكەوێتەوە".