سەرۆككۆماری ئێران: هیچ بڕیارێك بەبێ ڕەزامەندی ڕێبەری باڵا نادەین

پەیام

سەرۆككۆماری ئێران ڕایگەیاند: حكومەت هیچ بڕیارێك بەبێ هەماهەنگی و ڕەزامەندی ڕێبەری باڵا نادات.

لە میانی كۆبوونەوەی لەگەڵ سەرۆك و بەڕێوەبەرانی دامەزراوەی تەلەفزیۆن و ڕادیۆی وڵاتەكەی، مەسعوود پزیشكیان سەرۆككۆماری ئێران ئاماژەی بەوە كرد، كە هەموو هەنگاوەكانی حكومەت لە نێو چوارچێوەی ئەنجوومەنی باڵای ئاسایشی نیشتمانی و بە ڕەزامەندی ڕێبەری باڵا دەگیرێنە بەر، هەر لەو میانەیەدا وتیشی: ئەگەر هەمووان پێكەوە لەژێر چەتری سەركردایەتیدا بجوڵێینەوە، دوژمن هەرگیز بە ئامانجەكانی ناگات. 

پزیشكیان دووپاتیشی كردەوە، كە ڕێگە و چارەنووسی نەیارانی ئێران تەنیا "شكست و سەرشۆڕییە" و گەلی ئێرانیش ڕێگە نادات هیچ فشارێكی دەرەكی یەكڕیزیی نیشتمانی تێك بدات. 

لە بەشێكی دیكەی قسەكانیدا، سەرۆككۆماری ئێران هێرشی توندی كردە سەر ئەو كەسانەی هیوایان بە دەستوەردانی بیانی بەستووە و وتی: ئەو لایەنانەی بە "بێشەرمییەوە" چاوەڕێن ئەمریكا و ئیسرائیل زیان بە ئێران بگەیەنێت، یان وڵاتەكە دابەش بكەن، دەبێت لەبەردەم ڕای گشتیدا ڕووبەڕووی لێپرسینەوە ببنەوە. 

لە كۆتاییشدا سەرۆككۆماری ئێران جەختی لە پیرۆزیی ئەركی پاراستنی قەوارەی ئێران كردەوە و وتیشی: ڕێ بە هیچ هەوڵێك نادرێت كە ئامانج لێی تێكدانی سەقامگیری و وێرانكردنی ژێرخانی ئێران بێت.