بۆ چارەسەری قەیرانی سووتەمەنی؛ عێراق چەند پاڵاوگەیەکی نوێ بنیات دەنێت

وەزارەتی نەوتی عێراق ڕایگەیاند کۆمەڵێک پڕۆژەی ستراتیژی بۆ زیادکردنی ئاستی بەرهەمهێنانی سووتەمەنی و پڕکردنەوەی پێداویستیی ناوخۆ دەستپێکردووە، تاوەکو کۆتایی بەو قەیرانە بهێنێت کە لە چەند ڕۆژی ڕابردوودا دروست بووە. 
سەلیم ڕیکابی، وتەبێژی وەزارەتی نەوت، ئاشکرای کرد کە پلانەکەیان پەرەپێدان و دروستکردنی پاڵاوگەی نوێ لە پارێزگاکانی دیوانییە، میسان، نەجەف و قەزای حەدیسە لە ئەنبار دەگرێتەوە. ناوبراو ئاماژەی پێ کرد کە پڕۆژەی نوێی بەسڕە توانیویەتی ڕۆژانە ٤ بۆ ٥ ملیۆن لیتر بەنزینی باش (موحەسەن) بخاتە بازاڕەوە، کە ئەمەش کاریگەریی هەبووە لە کەمکردنەوەی پێویستی بە هاوردەکردنی دەرەکی و باشترکردنی دۆخی سووتەمەنی لە وڵاتدا. 
ئەم جموجۆڵەی وەزارەت دوای ئەوە دێت کە لە یەکەم شەوی جەژنی قوربانەوە، بەغداد و چەند پارێزگایەکی دیکە ڕووبەڕووی قەیرانێکی سەختی بەنزین بوونەتەوە و قەرەباڵغییەکی زۆر لەسەر وێستگەکان دروست بووە. وەزارەتی نەوت دانی بە هەبوونی کورتهێنان لە دابینکردنی بەنزیندا نا و هۆکارەکەشی بۆ کشانەوەی کۆمپانیایەکی بیانی لە پڕۆژەیەکی گرنگی باشوور بەهۆی بارودۆخی ئەمنیی ناوچەکە گەڕاندەوە؛ هەر بۆیە ئێستا حکومەت دەیەوێت لە ڕێگەی ئەم پڕۆژە نوێیانەوە سەقامگیری بۆ بازاڕی سووتەمەنی بگەڕێنێتەوە.