سەرۆکی پاریس: ئینریکی پێش هەردوو یارییەکەی ئارسیناڵ مژدەی پێدام

پەیام سپۆڕت - مەڕوان تاڵیب

ناسڕ خلێفی سەرۆکی یانەی پاریس سانجێرمان ئاشکرای کرد، لویس ئینریکی پێش هەردوو یارییەکەی ئارسیناڵ مژدەیەکی زۆر خۆشی پێداوە.

 لە نوێترین لێدوانی ڕۆژنامەوانیدا، خلێفی ڕایگەیاند، ئینریکی باشترین ڕاهێنەرە لە بەرەوپێشچوونی یاریزاناندا، دڵسۆزییەکەی یەکێکە لە هۆکارە گرنگەکانی سەرکەوتنەکان، کەس چاوەڕێی ئەوەی نەدەکرد نازناوی چامپیۆنسلیگ ببەنەوە، بەڵام هەنگاو بە هەنگاو ئەوەیان کرد.

سەرۆکەکەی پاریس ئاماژە بەوەش دەدات، پێش هەردوو یارییەکەی ئارسیناڵ لە نیوەیی کۆتایی، ئینریکی پێی وتووە نازناوی یانەپاڵەوانەکان دەبەنەوە، بۆیە لە ڕادەبەدەر دڵخۆش بووە بەو قسەیە و بڕوای نەدەکرد بەرانبەر ئینتەریش بەو ئەنجامە گەورەیە براوە بن و لە ماوەی تەنیا سێ کاتژمێر دوای یاریی کۆتایی پێنج ملیۆن درێسی یانەکە فرۆشراوە.

لە کۆتایدا ناسڕ دەڵێت: عۆسمان دێمبڵی شایەنی بردنەوەی خەڵاتی باڵۆندۆرە، نەک تەنیا بەهۆی ئاستییەوە، بەڵکو لە ناو یاریگا و دەرەوەی یاریگاش بە تەواوی پابەندە و خۆی دەپارێزێت.