سەرۆكی ڤێنزوێلا: هێرش بكرێتە سەرمان دەچینە قۆناغی خەباتی چەكدارییەوە

پەیام 

سەرۆكی ڤێنزوێلا ڕایدەگەیەنێت: ڤێنزوێلا بكەوێتە بەر هێرش دەچێتە دۆخی خەباتی چەكدارییەوە. میدیای ئەمریكییش دەڵێت: ترەمپ پلانی خستنی سەرۆكی ئەو وڵاتەی هەیە.

نیكۆلاس مادۆرۆ سەرۆكی ڤێنزوێلا، كە لە كاراكاس'ی پایتەختی لەگەڵ فەرماندە سەربازییەكانی سوپای وڵاتەكەی كۆ بووەوە، وەڵامی هەڕەشەكانی دۆناڵد ترەمپ سەرۆكی ئەمریكایی دایەوە كە ڕایگەیاندبوو: فڕۆكەكانیان دەخەینە خوارەوە.

سەرۆكی ڤێنزوێلا ڕایگەیاند: لە ئێستادا لە قۆناغی خەباتی بێ چەك داین. ئەوە قۆناغێكی پەیوەندی سیاسی و دامەزراوەییە، بەڵام ڤێنزوێلا بكەوێتە بەر هێرش، دۆخی خەباتی چەكداریی دەست پێ دەكات.

سەرۆكی ڤێنزوێلا وەك مەرجی گفتوگۆش لەگەڵ ئەمریكا ئاماژەی بەوە كرد "ئەگەر ڕێز لە گەلی وڵاتەكەی بگرن، ئەوە هەموو كاتێك ئامادەی دیالۆگ و دانوستانە".

لای خۆیەوە تۆڕی هەواڵی سی ئێن ئێنی ئەمریكی لە سەرچاوەی ئاگادارەوە بڵاویكردەوە: كۆشكی سپی لە چوارچێوەی ستراتیژی لاوازكردن، یان تەنانەت لەكارخستنی نیكۆڵاس مادۆرۆ، تاوتوێی ئەنجامدانی هێرشی سەربازیی لە نێوخۆی ڤێنزوێلا دەكات.

بەپێی ئەوەی سی ئێن ئێن بڵاویكردووەتەوە "هێشتا بڕیاری كۆتایی لەوبارەوە نەدراوە، بەڵام لەداهاتوودا بەئامانجگرتنی ڤێنزوێلا بە ئامانجی ناچاكردنی مادۆرۆ بە دەرچوون لە دەسەڵات بەدوور نازانرێت".