دیاربەكر.. مامۆستا عەلی باپیر سەردانی ڕێكخراوی ئازادی و مەدرەسەی صوفەی كرد

پەیام 

ئەمڕۆ مامۆستا عەلی باپیر بە یاوەریی وەفدێكی كۆمەڵی دادگەریی كوردستان، لە شاری دیاربەكر سەردانی ڕێكخراوی ئازادی (ئۆزگور) و مەدرەسەی (صوفە)ـی كرد.

سەرەتا وەفدەكە لە ئۆفیسی سەرەكیی كۆمەڵەی ڕێكخراوەكانی ئازادی (ئۆزگور) پێشوازییان لێ كرا و مامۆستا عەلی باپیر سوپاس و پێزانینی خۆی بۆ سەرۆك و ئەندامانی كۆمەڵەی ناوبراو دەربڕی، بەتایبەت لە بەرامبەر ڕێكخستنی كۆڕبەندی "كورد لە توركیا: برایەتیی و ئاشتیی كۆمەڵایەتی" كە ژمارەیەكی بەرچاو لە بەڕێوەبەرانی ڕێكخراوەكان، كەسایەتییە دیارەكان، نووسەران و ڕۆشنبیرانی لەخۆ گرتبوو، دیدارەكە بە بەشداریی د. یاسین ئەكتای، كەسایەتیی ئەكادیمیی و سیاسیی دیار، بەڕێوەچوو.

 تێیدا گفتوگۆیەكی چڕوپڕ لەسەر گۆڕانكارییە گرنگەكانی جیهان و ناوچەكە بەگشتیی و، پرسی ئاشتیی لە توركیا، دۆخی ئێستای عێڕاق و پڕۆسەی هەڵبژاردن كرا.

 لەلایەن خۆیەوە، د. ڕیزوان كایە، سەرۆكی گشتیی كۆمەڵەی ڕێكخراوەكانی ئازادی (ئۆزگور)، خۆشحاڵیی و پێشوازیی گەرمی خۆی و هاوكارانی بۆ ئەم سەردانە دەربڕیی و هیوای بەردەوامیی پەیوەندییەكان و دیداری لەو شێوەیەی خواست.

لە بەشێكی دیكەی سەردانەكەیدا، مامۆستا عەلی باپیر سەردانی مەدرەسەی (صوفە)ـی كردو لە لایەن مامۆستا مەلا تەیب ئەلبوتی و ژمارەیەك لە مامۆستایان و وانەبێژانی مەدرەسەكەوە بە گەرمی پێشوازیی لێكرا.

 لەم دیدارەشدا، مامۆستا عەلی باپیر سوپاس و پێزانینی خۆی ئاڕاستەی مەدرەسەكە كرد لەپای ئەو خزمەتە گەورەیەی پێشكەشی دەكەن بە فێرخوازانی زانستی شەرعیی، هەروەها ڕۆڵی گرنگی مەدرەسەكەی لە بواری پەروەردەو پێگەیاندنی فێرخوازاندا بەرز نرخاند.