سەرۆكی كۆمەڵ لەگەڵ بەرپرسانی وەزارەتی دەرەوەی توركیا كۆ بووەوە

پەیام 

لە چوارچێوەی سەردانەكەیدا بۆ توركیا، سەرۆكی كۆمەڵی دادگەری لە وەزارەتی دەرەوە لەگەڵ بەرپرسی دۆسیەی وڵاتانی عێراق و كۆماری ئیسلامیی ‏ئێران كۆ بووەوە.

لە درێژەی سەردانە فەرمییەكەیدا بۆ كۆماری توركیا، مامۆستا عەلی باپیر، سەرۆكی كۆمەڵی ‏دادگەریی كوردستان و وەفدی یاوەری بانگهێشتی وەزارەتی دەرەوەی توركیا كران. ‏

لە سەردانەكەدا، لەلایەن بەڕێز عەلی ڕەزا گونەی، بەرپرسی دۆسیەی وڵاتانی عێراق و كۆماری ئیسلامیی ‏ئێران لە وەزارەتی دەرەوە و چەندین بەرپرسی دیكەی وەزارەت، بەگەرمی پێشوازییان لێ كرا.

مامۆستا عەلی باپیر سوپاسی ئەو پێشوازییە گەرمەكەی كردن و خۆشحاڵی خۆی بە پرۆسەی ئاشتی و ‏هەوڵە بەردەوامەكان بۆ چارەسەركردنی ڕیشەیی كێشەی كورد لە توركیادا، دەربڕی. ‏

سەرۆكی كۆمەڵ ئاماژەی بەوەدا كە توركیا، بەگشتی بۆ عێراق و بەتایبەتی بۆ هەرێمی كوردستان، ‏گرنگییەكی تایبەتی هەیە، چ لە بواری ئابوورییەوە بێت، چ لە بواری ئەمنی و سیاسییەوە، هەروەها هیوای ‏خواست توركیا بتوانێت ببێتە جێنشینێكی ڕاستەقینەی دەوڵەتی عوسمانی لە پێدانی مافی گشت نەتەوە و ‏پێكهاتەكانیدا.

لەلایەن خۆیەوە، بەڕێز عەلی ڕەزا گونەی جەختی لەوە كردەوە كە دیدگای توركیا بۆ عێراق و هەرێمی ‏كوردستان بریتییە لە سەقامگیری و ئاشتەوایی لە ڕووی سیاسی و ئابووری و ئەمنییەوە. ناوبراو هۆكاری ‏ئەمەشی گەڕاندەوە بۆ نزیكیی جوگرافی و پەیوەندییە مێژوویی و كۆمەڵایەتییە قوڵەكان لەنێوان پێكهاتەكانی ‏عێراق و توركیادا. ‏

هەروەها ئاماژەی بەوەدا وەزارەتەكەیان لە نزیكەوە چاودێری ئەو كێشانە دەكەن كە هەرێمی كوردستان ‏و عێراقیان گرتووەتەوە.

هەر دوو لاش هاوڕا بوون لەسەر ئەوەی چارەسەركردنی زۆرینەی كێشەكان تەنها لە ڕێگەی یەكسانتەماشاكردنی هەموو پێكهاتە و نەتەوەكانەوە وەك هاووڵاتی و دەستەبەركردنی دادگەری كۆمەڵایەتی ‏دەبێت.