"بەغداد لە 12 ساڵی ڕابردوودا تەنها لەسەدا دووی بودجەی بۆ هەرێم ناردووە"

پەیام

وەزارەتی دارایی هەرێم لە بارەی ناردنی موچە لەلایەن حکومەتی فیدراڵییەوە راگەیەنراوێکی بڵاوکردەوە و ڕایگەیاند، بەغداد لە 12 ساڵی ڕابردوودا تەنها لەسەدا دووی بودجەی بۆ هەرێم ناردووە.

ڕونیشیكردووەتەوە، حکوومەتی فیدراڵ لە ساڵی 2014 تا 2025 تەنیا تێکڕای 2،04%ی بودجەی گشتیی عێراقی بۆ هەرێم ناردووە، کە تەنیا بەشی 46 مووچەی فەرمانبەرانی کردووە لە کۆی 144 مووچە.

لە راگەیەنراوەکەدا هاتووە: "لە 12 ساڵی رابردوو (2014 تا 2026)، دوای لێبڕینەکانی سەروەری و قەرز و پاپەندییەکانی تر بۆ هەرێم لەلایەن حکومەتی فیدراڵییەوە، دەکاتە تەنها رێژەی %2.4ـی بودجەی گشتیی عیراق لە جیاتی رێژەی 17% و رێژەی,%12.67 تایبەت بە پشکی هەرێمی کوردستان".

ئەوەشی روونکردووەتەوە، بڕی پارەی تەمویلکراو لەلایەن وەزارەتی دارایی فیدراڵ بۆ سەر هەژماری وەزارەتی دارایی هەرێم لەو ماوەیەدا، دەکاتە تەنها 41 ترلیۆن و 42 ملیار دینار بووە، ئەمەش لە کۆی 212 ترلیۆن و 671 ملیار دینار کە بەکارهاتووە بۆ تەمویل کردنی نزیکەی 46 موچەی فەرمانبەران و سوودمەندانی هەرێمی کوردستان لە کۆی 144 موچە لەو ماوەیەدا.

ئاماژەی بەوەشداوە: جگە لەوە ماوەی ساڵانی؛ 2014 و 2020 و 2022 حکومەتی فیدراڵ بەهۆی نەبوونی یاسای بودجە پارەی تەمویلکراوی بۆ هەرێمی کوردستان وەکو قەرز هەژمارکردووە، تا دواتر لە پشکی هەرێمی کوردستان لەگەڵ پەسەندکردنی بودجەی گشتی بیبڕێتەوە.