ئەنجوومەنی سەركردایەتیی كۆمەڵ كۆبوونەوەی ئاسایی لە هەولێر ئەنجام دا

پەیام

بە سەرپەرشتی مامۆستا عەلی باپیر سەرۆكی كۆمەڵی دادگەریی كوردستان ئەنجوومەنی سەركردایەتیی كۆبوونەوەی ئاسایی لە شاری هەولێر ئەنجام دا.

كۆبوونەوەكە هەلومەرجی دژوار و سەختی ناوچەكەی خستە بەرباس و لێكۆڵینەوە.

بە هۆی ئاگری شەڕی ئەمریكا و ئێران، ناوچەكە بە شێوەیەكی گشتی بەرەو ئاڵۆزی زیاتر دەڕوات و ئەمەیش هۆكارێكە كە قەیرانەكانی سەرشانی هاووڵاتیان زیاتر بێت، بەتایبەت بەهۆی دیاریكردنی نرخی دۆلار بەرانبەر دینار، كە بەداخەوە بەشێوەیەكی چاوەڕواننەكراو نرخی كاڵا زیادی كردەوە و هاووڵاتیان ڕووبەڕووی ژیانێكی سەخت دەبنەوە، بەتایبەت لە بوراەكانی سووتەمەنی كە بەرەو وەرزی زستان دەڕۆین، نرخی سووتەمەنی زیاد لە ئاستی چاوەڕوانكراو بەرزە و هاووڵاتیان ناتوانن بە ئاسانی دەستیان بكەوێت، دەبوو حكومەتی هەرێم لەگەڵ دەرچوونی ئەو بڕیارە ڕێوشوێنی پێوست بگرێتە بەر بۆ گراننەبوونی شتومەك.

لەلایەكی ترەوە هەڵگرتنی باجی خۆراك و دەرمان لەلایەن حكومەتی فیدراڵ و پابەندنەبوونی حكومەتی ماوەبەسەرچوو بەم بڕیارە، زیاتر هاووڵاتیانی هەرێم بەرەو قەیران دەبات.

ئەنجوومەنی سەركردایەتی پێی وایە كە دەبوو حكومەتەكانی بەغداد و هەرێم، لەم بارودۆخە بە پلانی گونجاو، هاوكاری هاووڵاتیان بن، نەك بارودۆخی سەرشانیان قورستر بكەن.

لەسەر ئاستی دەرەكی، ئەنجوومەنی سەركردایەتیی كۆمەڵ نیگەرانی خۆی دەردەبڕێت بەرانبەر ئەو بڕیارەی حكومەتی ئازەربایجان، كە پۆشینی لەچك و حیجابی لە ناوەندەكانی خوێندن یاساغ كردووە، ئەمەیش لەگەڵ بنەماكانی ئازادی یەك ناگرێتەوە دەخوازێت حكومەتەكانی ناوچەكە ڕۆڵی خۆیان بگێڕن، بۆ ئەوەی دەسەڵاتدارانی ئازەربایجان بە بڕیارەكەیاندا بچنەوە.

لە بارەی ناوخۆی حزبیشەوە، ئەنجومەنی سەركردایەتی هەندی پرس و بابەتی تایبەتی بەناوخۆی كۆمەڵ خستەبەر باس و بڕیاری پیویستیان لەبارەوە درا.