دوای دوو ساڵ و نیو یەكەم فڕۆكەی توركیا لە سلێمانی نیشتەوە

پەیام 

دوای زیاتر لە دوو ساڵ و نیو قەدەغەی گەشتە ئاسمانییەكانی سەر فڕۆكەخانەی سلێمانی، یەكەم فڕۆكەی توركیا لە سلێمانی نیشتەوە و بەرەو ئەستەنبوڵ بەڕێ كەوتەوە.

بەرەبەیانی ئەمڕۆ فڕۆكەیەكی هێڵی ئاسمانیی توركش ئێرلاین لە شاری ئەستەنبوڵەوە گەیشتە فڕۆكەخانەی نێودەوڵەتیی سلێمانی و 105 سەرنشینی بۆ شارەكە هەڵگرتبوو. دوای 90 خولەكیش فڕۆكەكە بە 123 گەشتیارەوە لە سلێمانی بەرەو ئەستەنبوڵ بەڕێ كەوتەوە.

ئەمە یەكەم فرۆكەیە، كە دوای دوو ساڵ و حەوت مانگ لە قەدەغەی گەشتە ئاسمانییەكانی ئەنقەرە لەسەر سلێمانی گەشت دەكات، بڕیارە هێڵی توركش ئێرلاین لەمەودوا هەفتانە چوار گەشت بۆ سلێمانی ڕێك بخات و لە مانگی داهاتوویشەوە هێڵی ئەی جێت-ی توركی دەست بە گەشتەكانی دەكاتەوە.

جێی باسە لە نیسانی ساڵی 2023ـەوە توركیا قەدەغەی ئاسمانیی خستە سەر سلێمانی و ڕایگەیاند، چالاكییەكانی پەكەكە لە سنووری سلێمانی زیادی كردووە و فڕۆكەخانەكەیان بۆ مەبەستی گەشتیاری بەكار هێناوە. مانگی ڕابردووش كۆتایی بە قەدەغەكە هات و ڕایگەیاند، گەشتەكان دەست پێ دەكاتەوە.

 بە وتەی بەرپرسانی فرۆكەخانەی نێودەوڵەتیی سلێمانی، قەدەغەی توركیا زیانی زیاتر لە شەش ملیۆن دۆلاری لێ داون و زیاتر لە سێیەكی گەشتەكانی كەم كردەوە.