سۆمۆ: ئامادەین ڕێككەوتنی نەوت لەگەڵ هەرێم درێژ بكەینەوە

پەیام

بەڕێوەبەری گشتیی كۆمپانیای سۆمۆ ڕایدەگەیەنێت، بەهۆی سەركەوتنی پرۆسەی بەبازاڕكردنی نەوتی هەرێمی كوردستان، ئامادەن لە دوای مانگی ئادارەوە ڕێككەوتنە مێژووییەكەی نێوانیان درێژ بكەنەوە.

عەلی نزار شەتری، بەڕێوەبەری گشتیی كۆمپانیای سۆمۆ ئاشكرای كرد كە ڕێككەوتنی ناردنە دەرەوەی نەوتی هەرێم لەڕێگەی كۆمپانیاكەیانەوە پڕۆسەیەكی "سەركەوتوو" بووە، بۆیە حكوومەت بڕیاری داوە تا كۆتایی مانگی ئادار بەردەوام بێت.
ناوبراو جەختی كردەوە كە ڕێككەوتنەكە مێژوویی بووە هەموو لایەنە پەیوەندیدارەكان لە هەوڵدان بۆ ئەوەی دوای ئەو وادەیەش ڕێككەوتنەكە درێژ بكەنەوە، بەو پێیەی پرۆسەی هەناردەكردنی ڕێكخستووەتەوە و داهاتی زیاتری بۆ وڵات دەستەبەر كردووە.

سەبارەت بە میكانیزمی كاركردنیان، بەڕێوەبەری سۆمۆ ڕوونیكردەوە كە كۆمپانیاكە كراوەیە بۆ ئەنجامدانی گرێبەست لەگەڵ خاوەن پاڵاوگەكان لە هەر شوێنێكی جیهان بن بەبێ جیاوازی.

ئاماژەی بەوەش دا كە ستراتیژییەتیان بریتییە لە پاراستنی هاوسەنگی لەنێوان فرۆشتنی تەواوی بڕی نەوتی بەردەست و بەدەستهێنانی بەرزترین داهات، بۆ ئەمەش چاودێریی وردی ئەو بازاڕانە دەكەن كە خواستیان لەسەرە، بێ ئەوەی دەستبەرداری بازاڕەكانی دیكە ببن، تاوەكو نەوتی عێراق لە هەموو جیهاندا پێگەی خۆی بپارێزێت.