"لە كۆی 647 پاڵێوراوی دوورخراوە تەنیا سیانیان بە بڕیاری یاسا گەڕێنراونەتەوە"

پەیام 

كۆمسیۆنی هەڵبژاردنەكانی عێراق ڕایدەگەیەنێت: تائێستا لە كۆی 647 پاڵێوراوی دوورخراوە تەنیا سیانیان بە بڕیاری یاسایی گەڕاونەتەوە.

حەسەن قەبەس ڕاوێژكاری یاسایی كۆمسیۆنی باڵای سەربەخۆی هەڵبژاردنەكانی عێراق ڕایگەیاند: تائێستا 647 پاڵێوراوی هەڵبژاردنی داهاتووی ئەنجوومەنی نوێنەران دوورخراونەتەوە.

لە لێدوانێكیدا بۆ ئاژانسی هەواڵی عێراقی، حەسەن قەبەس ڕایشیگەیاند: لەو ژمارەیە تەنیا سێ پاڵێوراو بە بڕیاری دادگا بۆ كێبڕكێی هەڵبژاردن گەڕاونەتەوە.

بەپێی ئەوەی ڕاوێژكارە یاساییەكەی كۆمسیۆنی هەڵبژاردن ڕایگەیاندووە: ناوی پاڵێوراوەكان بە مەبەستی وردبینی لە كۆمسیۆنەوە بۆ 13 دامودەزگای وەك: وەزارەتی بەرگری، ناوخۆ، دەستەی دەستپاكی، لێپرسینەوە و دادپەروەری، ئاسایشی نیشتمانی، دەزگای هەواڵگری دەنێردرێن.

ئەو وتیشی: هەر پاڵێوراوێك، یان حزبێك بڕیاری دوورخستنەوەی پاڵێوراوێكی پێ بگات سێ ڕۆژی بەردەستە بۆ تانەدا، دەستەی دادوەرییش پابەندە بەوەی لە 10 ڕۆژدا تانەكان یەكلایی بكاتەوە.