ڕۆژئاوای كوردستان ئەو پرۆگرامی خوێندنە ڕەت دەكاتەوە كە حكومەتی سووریا دای ناوە

پەیام

ڕۆژئاوای كوردستان ئەو پرۆگرامی خوێندنە ڕەت دەكاتەوە كە حكومەتی سووریا دای ناوە و، پرۆگرامی تایبەت بە ئیدارەی خۆسەر بۆ قوتابخانە و زانكۆكان جێبەجێ‌ دەكات.

میدیاكانی دەسەڵاتـی نوێی حكومەتی سووریا بڵاویان كردەوە، دیمەشق پرۆگرامی نوێی خوێندنی بۆ ناوچەكانی باكوور و ڕۆژهەڵاتی سووریا ناردووە بەڵام بەرپرسانی پەروەردە و خوێندنی باڵا لە پارێزگاكانی (حەسەكە و دێرەزوور و ڕەقە) كە لەژێر دەسەڵاتی هێزەكانی سووریای دیموكرات "هەسەدە"دایە ئاگادار كراونەتەوە لەوەی، ئەو پرۆگرامەی كە دیمەشق ناردوویەتی، لە سنووری ئیدارەی خۆسەر ناخوێنرێت و قوتابخانە و زانكۆكان لەسەر پڕۆگرامەكانی خۆیان بەردەوام دەبن.

تەلەفزیۆنی فەرمیی سووریا بلاوی كردووەتەوە، بڕیاری قەدەغەكردنی پڕۆگرامی حكومەت لە قوتابخانە و زانكۆكان گرژییەكان لەنێوان ڕۆژئاوا و دیمەشق زیاد دەكات. تەنانەت تۆمەتی ئەوەی داوەتە پاڵ هەسەدە ئەمە هەنگاوێكە بۆ داواكردنی لامەركەزی و جیابوونەوە لە سووریا.

لەبەرانبەدا محەمەد شاهین، بەرپرسی دەستەی پەروەردە لە باكوور و ڕۆژهەڵاتی سووریا ڕایگەیاندووە، ئەو پرۆگرامەی حكومەتی نوێی سووریا ناردوویەتی ڕەتی دەكەنەوە چونكە بە گفتوگۆ دانەنراوە و بۆ هەموو نەتەوەكان نییە، بەڵكو تەنیا بۆ یەك نەتەوەیە وخواستی هەمووانی تێدا جێ نەكراوەتەوە. هەر بۆیە قوتابخانەكان ئاگادار كراونەتەوە لەسەر هەمان پرۆگرامی ساڵانی ڕابردوو بڕۆن.