هەرێم بەرمیلێک نەوت بە 104 هەزار دینار دەداتە هاوڵاتییان و لە عێراق بە 30 هەزارە

پەیام 

حكومەتی ماوەبەسەرچووی هەرێم لە ئەمڕۆوە دەستى بە دابەشکردنى نەوتى سپى بەسەر هاوڵاتییاندا کرد و بۆ هەر بەرمیلێک بڕى 104 هەزار دینار وەردەگیرێت، لە کاتێکدا لە عێراق ئەو بڕە نەوتە بە 30 هەزار دینار دەدرێتە هاوڵاتیان.

وەزارەتی سامانە سروشتییەكانی حكومەتی ماوەبەسەرچووی هەرێم ڕایگەیاند، لە ئەمڕۆوە پرۆسەی دابەشكردنی نەوتی سپی بۆ وەرزی زستان لە ناوچە شاخاوییەكانی هەولێر، سلێمانی، هەڵەبجە، دهۆك و ئیدارە سەربەخۆكانی، سۆران، راپەرین، گەرمیان و زاخۆ دەست پێ دەكات و پشكی هەر خێزانێك یەك بەرمیل واتە 200 لیتر دەبێت.

وەزارەتەكە ڕاشیگەیاندووە، نرخی حكومەت بۆ هەر بەرمیلێك نەوت 104 هەزار دینارە. ئەمە لە كاتێكدایە بەپێی ڕێككەوتنی نێوان هەرێم و بەغداد ڕۆژانە 50 هەزار بەرمیل نەوت لە بەرهەمی ناوخۆیی بۆ پێداویستیی ناوخۆی هەرێمی كوردستان دابین كراوە، بەڵام تا ئێستا حكومەتی ماوەبەسەرچوو نەیتوانیوە بە نرخی پاڵپشتیكراوی ڕاستەقینە نەوت بەسەر هاووڵاتیاندا دابەش بكات.