جینۆسایدی فەڵەستینییەکان لە غەزە

ئەگەر هیچ کەس و نەتەوەیەک لەسەر گۆی زەوی دژ بە جینۆساید و تاوانی دژ بە مرۆڤایەتی نەبێ، دەبێ کورد دژی بێ. یەکێک لە بنەڕەتەکان لە کەسایەتیی کورددا، دەبێ دژبون بێ بە جینۆساید و تاوانی دژ بە مرۆڤایەتی و سڕینەوەی نەژادی و قەتڵوعام جا لە غەزە بێ یا لە سوەیدا یا لە رواندا و کۆسۆڤۆ و ئەڵمانیا.
ئەوەی ئیسرائیل لە غەزە دژ بە فەڵەستینییەکان ئەنجامیدەدا، جینۆسایدە، پێویستە وەک خۆی بیناسێنین.
جینۆساید تاوانی تاوانەکانە، گەورەترین ئاستی تاوانە، بۆیە پێی دەگوترێ تاوان دژی تەواوی مرۆڤایەتی. ئیسرائیل کە رێ لە خواردن دەگرێ بۆ خەڵکی غەزە بڕوات، ئامانجی لەناوبردنی تەواوی خەڵکی غەزەیە، ئامانجییەتی وجود و ژیان و کەلتوری فەڵەستینی لەسەر خاکی غەزە بسڕێتەوە. 
کاتێک باسی جینۆساید و تاوانی دژ بە مرۆڤایەتیی دەکەین، دەبێ زۆر بەئاگا بین لەوەی چۆن باسی ئەو جینۆسایدە دەکەین بەتایبەت دەبێ زۆر بەئاگا بین بەراوردی نەکەین بە تاوانی دیکەی وەکو موچەبڕین چونکە ئەوە بەکەمتەماشاکردن و کەمکردنەوەیە لە تاوانەکە.
دوا شت دەمەوێ بڵێم، هەندێک موسڵمانی کورد لە هۆڵۆکۆستی جو کەمدەکەنەوە یان هەر رەتیدەکەنەوە بە هۆی ئەوەی ئێستا دەوڵەتی جو لە بەرانبەر فەڵەستینییەکان ئەنجامیدەدات، ئەوە دژەجوبونە. ئەگەر تۆ ئەوە بکەیت، ئەوا تۆ دژ بە جینۆساید نیت، تەنها دژ بەوەی جینۆساید بەرانبەر ئەوانە بکرێ کە خۆشتدەوێن و لە خۆت نزیکن. هەندێک کوردی ئێثنۆناشناڵیست بە بیانوی دیکتاتۆرییەتی سەدام حوسێن و پشتیوانیی هەندێک عەرەب لە سەدام حوسێن -کە لە بنەڕەتەوە ئەوانە هەر رقئەستورن بەرانبەر عەرەب و ئیسلامۆفۆبیستن-، دڵخۆشن بە جینۆسایدی فەڵەستینییەکان، ئەگەر وا بیردەکەیتەوە، تۆ لەبیرتکردوە کە بەشێک لەوانەی بەشدار بون لە جینۆسایدی کورد خودی کورد بون و لەگەڵ سەدام حوسێن بون. لەوە هەر گەڕێ جیۆپۆلەتیکی ناوچەکە وای کردبو بەشێک لە کوردی عێراق لەگەڵ ئێران بن و پشتیوانی لە ئێران وەربگرن لەکاتێکدا ئێران دژ بە کوردی ئێران تاوانی ئەنجامدەدا، و بەشێک لە کوردی ئێران پشتیوانییان لە سەدام حوسێن وەردەگرت لە کاتێکدا سەدام تاوانی جینۆسایدی بەرانبەر کورد لە عێراق ئەنجامدەدا.
جینۆساید تاوانی تاوانەکانە، تاوانە دژ بە کۆی مرۆڤایەتی. لە هەرکوێیەک جینۆساید رویدا، وابزانە تۆی ژیان و وجودت لێ دەسەنرێتەوە.