لیستی كۆمەڵی دادگەریی بۆ هەڵبژاردنی پەرلەمانى عێراق ژمارە 285ی پێدرا

پەیام 

كۆمسیۆنی هەڵبژاردنەكانی عێراق تیروپشكی بۆ ژمارەی لیست و هاوپەیمانێتییەكان بۆ هەڵبژاردنی ئەنجوومەنی نوێنەران كرد و كۆمەڵی دادگەرییش ژمارە 285 ی پێدرا.

ئێوارەی ئەمڕۆ 9ى 8ى 2025، كۆمسیۆنی باڵای سەربەخۆی هەڵبژاردنەكانی عێراق تیروپشكی پێدانی ژمارەی بەو هاوپەیمانی و حزب و پاڵێوراوە تاكەكەسییانەی بەشداریی هەڵبژاردنی خولی شەشەمی ئەنجوومەنی نوێنەرانی عێراق دەكەن، ئەنجام دا.

لەو میانەیەشدا بەپێی تیروپشكەكە لیستی كۆمەڵی دادگەریی كوردستان بۆ هەڵبژاردنی ئەنجوومەنی نوێنەرانی عێراق، ژمارە 285ی پێ درا.

بەر لە تیروپشكەكە، بەگوێرەی دواین داتای كۆمسیۆن، ژمارەی كۆتایی هاوپەیمانی و حزب و پاڵێوراو تاكەكەسییەكانی بەشدار لە هەڵبژاردنی ئەنجوومەنی نوێنەران كە بڕیارە رۆژی 11ی تشرینی دووەم، مانگی 11ی ئەمساڵ بەڕێوە بچێت، بریتییە لە 31 هاوپەیمانی، 38 پارتی سیاسی و 76 پاڵێوراوی تاكەكەسی.
تیروپشكەكە لە ژمارە (201)ـەوە دەستی پێ كردووە و بە 293 كۆتایی هاتووە.