جەنگی سەر غەززە بەردەوامە و ئاماری قوربانییانیش هەر زیاد دەكات

پەیام 

جەنگی سەر غەززە بەردەوامی هەیە و ئاماری قوربانییانیش هەر زیاد دەكات، لە 24 كاتژمێریشدا 60 كەس شەهید بوون.

ئەمڕۆ 75 ڕۆژە سوپای زایۆنی ئاگربەستی غەززە پێشێل دەكات و هاوشێوەی ڕۆژانی ڕابردوو بۆردومانی ناوچەی جیاوازەكانی كردوووە و بەهۆیەوە لە ناوچەی سكە لە ناوەڕاستی خانیونس فەڵەستینیەك شەهید و ژمارەیەكی دیكە بریندار بوون.

لە بۆردومانی شارۆچكەی سوهەیلای ڕۆژهەڵاتی خانیونسیش دوو هاووڵاتی شەهید بوون.

لە ڕەفەحیش لە باشووری غەززە، هاوشێوەی ڕۆژی ڕابردوو لە كاتی هەوڵدانیان بۆ گەیشتن بە هاوكارییە مرۆییەكان لەلایەن سوپای زایۆنییەوە تەقە لە ئاوارە فەڵەستینییەكان كرا و لە ئاكامدا دوو فەڵەستینی شەهید بوون.

لە دێربەلەح و شاری غەززەیش بۆ‌وردومانی چڕ بەردەوام هەبووە، سوپای زایۆنی ژمارەیەك خانوویشی لە خانیونس تەقاندەوە.

لە خێمەی ئاوارەكانی ناوچەی شەنتیش لە شاری غەززە چوار كەسیی دیكە شەهید بوون، لە بەیتلاهیایش لەژێر داروپەردوودا دوو تەرم دەرهێنراونەوە.

لای خۆیشیەوە وەزراەتی تەندروستیی غەززە بڵاوی كردووەتەوە كە لە 24 كاتژمێری ڕابردوودا 60 شەهید كە یەكێکیان ڕووفات بووە لەگەڵ 284 بریندار گەیەنراونەتە نەخۆشخانەكانی كەرتی غەززە، هێشتایش ژمارەیەكی زۆر لە قوربانیان لەژێر داروپەردووەكاندا ماونەتەوە.

بەوەیش ئاماری تەواوی جەنگەكە بۆ زیاتر لە 178 هەزار شەهید و بریندار بەرز بووەتەوە كە زیاتر لە 16 هەزاری لە دوای شكانی ئاگربەستەوە بووە لە 18ی ئاداری ڕابردوودا.