دەیان هەزار كەس لە مزگەوتی ئەقسای پیرۆز بەكۆمەڵ نوێژی جەژنی قوربانیان ئەنجام دا

پەیام

سەرەڕای ڕێگرییەكان لەلایەن قەوارەی زایۆنی داگیركەر و جولەكە ئۆردوگانشینەكانەوە، دەیان هەزار كەس بە تەكبیراتەوە پێشوازییان لە یەكەم ڕۆژی جەژنی قوربانی پیرۆز كرد و هەر لە كاتژمێرەكانی بەرەبەیانییەوە ڕوویان لە مزگەوتی ئەقسا كرد و نوێژی بەیانی و دواتریش نوێژی جەژنیان ئەنجام دا.

جولەكە ئۆردوگانشینەكان لە دەرەوەی مزگەوت و لەسەر ڕێگاكان سوكایەتییان بە موسڵمانان دەكرد و گۆرانی و هەندێك دروشمی دیكەیان دەوتەوە، بەڵام سەرەڕای ئەم ڕەفتارە ناشرینانە و ڕێگرییەكانی هێزە ئەمنییەكانی قەوارەی داگیركەر لە چوونی نوێژخوێنان بۆ مزگەوت، حەوشە و مەیدانەكانی مزگەوتی ئەقسا پڕ بوون لە نزیكەی 80 هەزار نوێژخوێن كە لە قودس و ناوچەكانی دیكەی فەڵەستینەوە هاتبوون.

ئەمڕۆ یەكەم ڕۆژی جەژنی قوربانی پیرۆزە و موسڵمانان لە تەواوی جیهان بەو بۆنەوە خۆشی و شادی دەردەبڕن، هەروەها موسڵمانانی هەر وڵاتێك بەپێی ئادابەكانی ئیسلام و نەریت و كەلتوری خۆیان، ڕۆژانی جەژن بەڕێ دەكەن، مزگەوتی ئەقسایش لە ڕووی ئەنجامدانی نوێژی جەژنەكانەوە تایبەتمەندی خۆی هەیە.