ڕۆژی جەژن و سێ ڕۆژەكانی دواتریش حاجییان بەردباران ئەنجام دەدەن

پەیام

دوای مانەوەیان لە ڕۆژی ڕابردوودا لە خاكی عەرەفات، حاجیانی ماڵی خودا بەرەبەیانی ئەمڕۆ بەردبارانی گەورەیان ئەنجام دا و بەشیی زۆریان هەر ئەمڕۆ بە سەرتاشین و كورتكردنەوەی و سەربڕینی ئاژەڵ لە ئیحرام دەرچوون.

دوێنێ، پێنجشەممە، نۆی زولحیجە، حاجیان بە مانەوە لە خاك و كێوی عەرەفات پایەی گەورەی فەریزەی حەجیان ئەنجام دا، شەوی ڕابردووش لە دوای ڕۆژاوابوونەوە لە عەرەفاتەوە بەرەو موزدەلیفە بەڕێ كەوتن و نوێژی شێوان و خەوتنانیان بە كۆكراوەیی و كورتكراوەیی ئەنجام دا و دواتر چوونە مینا، لە میناش لە بەرەبەیانی ئەمڕۆوە و بەو وردە بەردانەی لە موزدەلیفە كۆیان كردبووەوە بەردبارانی گەورەیان ئەنجام دا.

بە بەردبارانكردنی گەورە و سەرتاشین، یان كورتكردنەوە و سەربڕینی ئاژەڵ حاجیان لە بەشێك لە قەدەغەكراوەكانی ئیحرام دەردەچن، بە چوونە كەعبە و ئەنجامدانی تەوافی ئیفازە و سەفاومەڕوەش، لە تەواوی قەدەغەكراوەكان دەردەچن و ئیحرامی حەج دادەنێن.
سێ ڕۆژەكانی دوای جەژنیش حاجیان ڕۆژانە هەر سێ بەردبارانكردنە ئەنجام دەدەنەوە.

ڕۆژی چوارشەممە، هەشتی مانگی كۆچی كە بە (ڕۆژی تەرویە) ناسراوە، ئەنجامدانی حەج دەستی پێكرد و شەش ڕۆژ دەخایەنێت، زۆرینەی ڕۆژەكانی حاجیان لە مینا دەمێننەوە تا لە كۆتاییدا و بۆ تەوافی ماڵاوایی بۆ كەعبە دەگەڕێنەوە.

دەستەی گشتی ئاماری سعودیە پێشتر بڵاوی كردەوە كە ئەمساڵ یەك ملیۆن و 673 هەزار و 230 كەس بەشدارییان لە حەجدا كردووە، لەو ژمارەیە یەك ملیۆن و 506 هەزار و 576یان لە دەرەوەی سعودیەوە هاتوون.