غەززە.. دەنگی (الله أكبر)ی جەژن و بۆردومانەكان تێكەڵ بەیەكتری بوون

پەیام

دەنگی دروشمی (اللە اكبر)ی جەژن و تەقە و بۆردومانەكانی سوپای زایۆنی تێكەڵ بە یەكدی بوون، بەهۆی بەردەوامی هێرش و بۆردومانەكانەوە زیاتر لە 50 كەسی دیكە شەهید بوون.

81 ڕۆژە سوپای داگیركەری زایۆنی ئاگربەستی غەززە پێشێل دەكات، لە نوێترین پێشهاتدا، ئەمڕۆ سوپای داگیركەری زایۆنی هێرشی كردە سەر حەی توفاح لە شاری غەززە و شارۆچكەی جەبالیا لە باكووری كەرتی غەززە، لەم هێرشانەدا ژمارەیەك خانوو و یەكەی نیشتەجێبوونی كردە ئامانج.

لەلایەكی دیكەوە سوپای زایۆنی لەڕێی هێرشی ئاسمانی و تۆپبارانەوە، چەند شوێنێكی لە خانیوونس لە باشووری كەرتی غەززە بە ئامانج گرت، هاوكات چەند بۆردومانێكیشی بۆ سەر كەمپەكانی نوسەیڕات لە ناوەڕاستی كەرتی غەززە ئەنجام دا.

بەهۆی بۆردومانەكانی سوپای زایۆنی بۆ سەر كەرتی غەززە، لە دوێنێوە تا ئێستا زیاتر لە 50 كەس شەهید و دەیانی دیكەش بریندار بوون.

لە دوای بۆردومانكردنی كەمپی ڕۆژنامەنووسان لە غەززە، وێنەگرێك بەناوی ئەحمەد قەلجە بە سەختی بریندار بوو، دواتر لە نەخۆشخانە مەعمەدانی بەهۆی سەختی برینەكەیەوە شەهید بوو.