نیوەی یەكەمی ئەمساڵ هاوردەی ئۆتۆمبێلی چینی بۆ عێراق 75% زیادیكردووە

پەیام 

بەپێی داتا فەڕمییەكانی گومرگی چین و یابان و كۆریای باشوور، هەناردەی ئۆتۆمبێل بۆ عێراق لە نیوەی یەكەمی ئەمساڵدا بەراورد بە نیوەی یەكەمی ساڵی ڕابردوو بە ڕێژەی سەدا 23 زیادیكردووە.

لە ماوەی نیوەی یەكەمی ئەمساڵدا، ژمارەی ئەو ئۆتۆمبێلانەی چین كە ڕاستەوخۆ لەو وڵاتەوە بۆ عێراق هەناردە كراون 18 هەزار بووە، لەكاتێكدا لە نیوەی یەكەمی ساڵی ڕابردوودا 10 هەزار و 500 بووە، بەو پێیە ڕێژەكە 75% زیادی كردووە.

لە یابانیشەوە نزیكەی 12 هەزار ئۆتۆمبێل هەناردەی عێراق كراون، ئەوەش بەراورد بە نیوەی یەكەمی ساڵی 2024 زیادی كردووە كە ئەوكات نۆ هەزار و 300 بووە.

پێچەوانەی چین و یابان، هاوردەی ئۆتۆمبێل لە كۆریای باشوورەوە بۆ عێراق كەمی كردووە، بەجۆرێك "نیوەی یەكەمی ئەمساڵ نۆ هەزار و 500 ئۆتۆمبێل هاوردە كراوە، لە كاتێكدا نیوەی یەكەمی ساڵی پێشوو 12 هەزار و 700 ئۆتۆمبێل بووە".

كۆی گشتیی بەهای ئەو ئۆتۆمبێلانەی لە نیوەی یەكەمی ساڵی 2025دا لە چین و یابان و كۆریای باشوورەوە هەناردەی عێراق كراوە، 903 ملیۆن دۆلار بووە، لە كاتێكدا لە نیوەی یەكەمی ساڵی 2024دا 713 ملیۆن دۆلار بووە. 

بەپێی داتاكان، ئۆتۆمبێلە هایبرێدەكان، ئەوانەی بە بەنزین و كارەباش كار دەكەن، سەدا 10ی ئۆتۆمبێلە هاوردەكراون پێك دەهێنێت، لە كاتێكدا نیوەی یەكەمی ساڵی ڕابردوو سەدا هەشتی پێكدەهێنا.