ئاسیا گەورەترین کڕیاری نەوتی عێراقە

په‌یام

بانکی ناوەندیی عێراق، ئەمڕۆ چوارشەممە، ئامارێکی نوێی بڵاوکردەوە کە تێیدا ئاشکرای کردووە، بەهای هەناردەی نەوتی عێراق بۆ وڵاتانی کیشوەری ئاسیا لە ماوەی ساڵی ٢٠٢٤دا، ٧٠ ملیار دۆلاری تێپەڕاندووە.
بەپێی ئەو ئامارەی کە ئاژانسی "شەفەق نیوز" بڵاوی کردووەتەوە، وڵاتانی ئاسیا، لەنێویاندا چین، هیندستان، کۆریای باشوور و چەند وڵاتێکی دیکە، بە بەهای ٧١.٩١٥ ملیار دۆلار نەوتیان لە عێراق کڕیوە.  ئەم ژمارەیەش بەرزبوونەوەیەکی بەرچاوی بەخۆیەوە بینیوە بە بەراورد بە ساڵی ٢٠٢٣، کە لەو ساڵەدا بەهای کڕینی نەوتی عێراق لەلایەن هەمان وڵاتانەوە ٦٧.١٤٤ ملیار دۆلار بووە. 

ڕیزبەندیی کیشوەر و ناوچەکانی دیکەی کڕیاری نەوتی عێراق:
بانکی ناوەندی ئاماژەی بەوەش کردووە کە دوای کیشوەری ئاسیا، ڕیزبەندیی ناوچەکانی دیکەی جیهان بۆ کڕینی نەوتی عێراق لە ساڵی ٢٠٢٤دا بەم شێوەیە بووە:
ئەوروپای ڕۆژئاوا: بە کڕینی نەوت بە بەهای ١٥.٥٧٣ ملیار دۆلار لە پلەی دووەمدا دێت. 
وڵاتانی عەرەبی: بە بەهای ٦.٤٨٤ ملیار دۆلار پلەی سێیەمیان گرتووە 
وڵاتانی ئەمریکای باکوور: بە کڕینی نەوت بە بەهای ٦.٤٠٣ ملیار دۆلار لە ڕیزبەندیی چوارەمدا دێن. 
ئەوروپای ڕۆژهەڵات: بە بەهای ٥٦٥ ملیۆن دۆلار لە پلەی پێنجەمدایە. 
وڵاتانی ئەفریقای ناعەرەبی: بە کەمترین بڕ دێن کە تەنها ٥٠ ملیۆن دۆلارە. 

داهاتی گشتیی عێراق لە هەناردەی نەوتی خاو لە ساڵی ٢٠٢٤دا گەیشتووەتە نزیکەی ٩٥.٥ ملیار دۆلار، کە بەراورد بە ساڵی پێشتر (٩٤.٤ ملیار دۆلار) زیادبوونێکی کەمی بەخۆیەوە بینیوە. ئەم داتایانە ئەوە دووپات دەکەنەوە کە کیشوەری ئاسیا بازاڕی سەرەکی و ستراتیژیی نەوتی عێراقە و پشکی شێری لە هەناردەی نەوتی ئەو وڵاتەدا بەرکەوتووە.