جەلادەكەی نوگرە سەلمان، حەجاج دانی بە تاوانەكانیدا نا

پەیام

حەجاج یاخود عەجاج، جەلادەكەی بەندینخانەی نوگرەسەلمان دانی بە تاوانەكانیدا ناوە، كە ڕۆژانە بە بەرنامە زیندانییەكانیانی برسی كردووە و دەستدرێژیی سێكسیی كردووەتە سەریان، بەهۆیەوە تەنیا لە ماوەی 10 مانگدا دوو لەسەر سێی زیندانییەكان گیانیان لەدەستداوە.

عەبدولكەریم عەبد فازڵ، سەرۆكی دەزگای ئاسایشی نیشتمانی ڕایگەیاند، حەجاج لە دانپێدانانەكانیدا نكوڵی لە بەرپرسیارێتیی خۆی لە تاوانەكان نەكردووە، بەڵكو دانی بەوەداناوە كە سەرپەرشتیی برسیكردن و دەستدرێژیی ڕۆژانەی كردووە بۆ سەر زیندانییەكان وەك ئامرازێك بۆ كوشتنی بەكۆمەڵ.

حەجاج وتوشیەتی كاتێك بەڕێوەبردنی زیندانەكەی پێ سپێردراوە لە ساڵی 1989 نزیكەی 400 زیندانیی عەرەبی تێدا بووە و هەموویان دەركراون، لەبری ئەوان نزیكەی سێ هەزار گیراوی كوردیان لە سلێمانی و هەولێرەوە بۆ نێردراوە.

شایەتحاڵەكانی ئەنفال جەختیان لەوە كردوەتەوە، كە لە زیندانییانی نوگرەسەلمان لە ناچاریدا پاشماوەكانیان خواردوە و هەروەها ڕۆژانە ڕووبەڕووی دەستدرێژی و سوكایەتی بوونەتەوە.

فەزیلە، كە یەكەم كەس بوو سكاڵای یاسایی دژی ئەفسەری پێشوو ئەحمەد حەردان عوبەیدی ناسراو بە (حەجاج) تۆماركرد، وتی "دادپەروەری مافی قوربانیانە، پێویستە ڕۆڵی ڕزگاربووان لە هیچ دادگاییكردنێكدا فەرامۆش نەكرێت".

دەستگیركردنی حەجاج دوای لێكۆڵینەوەیەكی ورد و دانپێدانانی ئەفسەرانی پێشووی ڕژێمی بەعس بووە، كە ئاشكرایان كردووە حەجاج رۆڵی سەرەكیی لە تاوانەكانی كۆمەڵكوژی و ڕاگواستنی زۆرەملێدا هەبووە.