عۆن زیاب: عێراق هێندە بێئاو بووە لە 80 ساڵى ڕابردوودا بەو دۆخەدا تێنەپەڕیوە

پەیام

عێراق داوای لە توركیا كردووە بۆ هەر دوو مانگی 10 و 11 بە بڕی یەك ملیار مەتر چوارگۆشە ئاو بۆ وڵاتەكەی بەر بداتەوە، وەزیری سەرچاوەكانی ئاوی وڵاتەکەش دەڵێت "عێراق هێندە بێئاو بووە لە 80 ساڵى ڕابردوودا بەو دۆخەدا تێنەپەڕیوە".

عۆن زیاب عەبدوڵڵا وەزیری سەرچاوەكانی ئاوی حكومەتی عێراق ڕایگەیاند: داوامان لە توركیا كردووە بۆ هەر دوو مانگی 10 و 11ی ئەمساڵ لە ڕێی ڕووباری دیجلەوە 500 مەتر چوارگۆشە و لە ڕووباری فوڕاتیشەوە 500 مەتر چوارگۆشە ئاو بۆ عێراق بەر بداتەوە.

لە ڕاگەیەنراوێكدا، وەزارەتی سەرچاوەكانی ئاوی عێراق  ئاشكرایشی كرد "داواكەی عێراق لە میانی سەردانی وەفدێكی باڵا بۆ ئەنقەرە لەبارەی پرسی ئاوەوە هات كە لایەنی عێراق ئامادەیی بۆ هاوكاریی عێراق لەو ڕووەوە دەربڕی".

بەپێی ئەوەی وەزیری ئاوی عێراق ڕایگەیاندووە "دۆخی ئاوی ئەمساڵی عێراق لە مێژوودا قورسترینە و عێراق لە ساڵی 1933ـەوە بە دۆخی وادا تێنەپەڕیوە".

وەزیری سەرچاوەكانی ئاوی عێراق پێشبینییشی كرد ئەمساڵ و بەتایبەتیش لە سەرەتای كۆتا مانگی ساڵەوە بۆ عێراق ساڵێكی باراناوی بێت. 

ڕۆژی هەینی شاندێكی عێراق، بە سەرۆكایەتی جێگری سەرۆكوەزیران و وەزیری دەرەوە و ئەندامێتی وەزیری سەرچاوەكانی ئاو و بەرپرسانی وەزارەتەكانی ئاو و كشتوكاڵ و ژینگە و نوێنەرایەتی هەرێمی كوردستان، تایبەت بە پرسی قەیرانی ئاو سەردانی توركیای كرد.