ڕێككەوتنی سەرەتایی بۆ دابینكردنی زەوی بەسەر زیانلێكەوتووانی ماددەی 140ڕاگەیەندرا

پەیام

ڕێككەوتنی سەرەتایی بۆ دابینكردنی زەوی بەسەر زیانلێكەوتووانی ماددەی 140ڕاگەیەندرا.

د. دژوار فایەق، ڕاوێژكاری باڵا و سەرۆكی بۆردی ماددەی 140، هاوكات نوێنەری حكومەتی ماوەبەسەرچووی هەرێم لە لیژنەی جێبەجێكاری ماددەی 140 لە بەغدا، ئەمڕۆ پێكهاتنی ڕێككەوتنێكی سەرەتایی لە سكرتارییەتی گشتیی ئەنجومەنی وەزیرانی عێراق ئاشكرا كرد، كە تایبەتە بە قەرەبووكردنەوەی زیانلێكەوتووانی ناوچە جێناكۆكەكان.

ئەو ڕاوێژكارە باڵایە ڕوونی كردەوە كە بەپێی ڕێككەوتنە سەرەتاییەكە، بڕیار دراوە زەوی بۆ ئەو زیانلێكەوتووانە تەرخان بكرێت كە تا ئێستا قەرەبووی ماددییان وەرنەگرتووە، لەگەڵ پابەندبوون بەوەی بەهای ئەو زەوییانە لە بڕی قەرەبووە داراییە ڕەسەنەكان كەمتر نەبێت.

هەروەها، د. دژوار فایەق داوای لە سەرۆك كۆماری عێراق كرد كە پێویستە دەسەڵاتە دەستوورییەكانی بەكاربهێنێت بۆ پاڵپشتیكردنی پرۆسەی جێبەجێكردنی ماددەی 140 و دۆزینەوەی چارەسەرێكی ڕیشەیی بۆ كێشەكانی نێوان بەغدا و هەولێر.

ئەو دووپاتی كردەوە كە ماددەی 140 چوارچێوەیەكی دەستوورییە بۆ یەكلاكردنەوەی دۆسیەی ناوچە جێناكۆكەكان و كۆتاییهێنان بە شوێنەواری گۆڕانكاریی دیمۆگرافی، بەتایبەتی لە كەركووك و ناوچە كوردستانییەكانی دەرەوەی ئیدارەی هەرێم.

هاوكات جەختی لەسەر ئەوە كردەوە كە جێبەجێكردنی لە ڕێگەی سێ قۆناغەوە دەبێت، داواشی كرد كە جێبەجێكردنی ماددەی 140 بكرێتە مەرجێكی سەرەكی و حەتمی لە گفتوگۆكانی پێكهێنانی حكوومەتی نوێی عێراقدا.