تەیف سامی: یەکلانەبوونەوەى کێشەکان لەگەڵ هەرێم هۆکارى دواكەوتنی ناردنی خشتەكانی بودجەیە

پەیام

تەیف سامی، وەزیری دارایی عێراق رایگەیاند: هۆکارى دواكەوتنی ناردنی خشتەكانی بودجە بۆ پەرلەمان بەهۆى یەکلانەبوونەوەى کێشەکانە لەگەڵ هەرێم. 

بەگوێرەی راگەیەندراوێكی لیژنەی دارایی پەرلەمانی عێراق، تەیف سامی، وەزیری دارایی عێراق، لە كۆبونەوەی ئەمڕۆیدا لەگەڵ لیژنەكەیان، راپۆرتێكی وردی لەبارەی داهات و خەرجییەكانی حكومەت و خشتەكانی بودجە خستووەتەڕوو.

تەیف سامی ڕایگەیاندووە: دواكەوتنی ناردنی خشتەكانی بودجە بۆ پەرلەمان لەبەر دوو هۆكارە: بەرزو نزمی لە نرخی نەوت و یەكلانەبووەنەوەی كێشەكان لەگەڵ هەرێمی كوردستان.

ڕاشیگەیاندووە:  ئەم دۆخە بووەتە كۆسپ لەبەردەم دابینكردنی پارەی بودجەی گشتی.

جەختی لەوەشکردووەتەوە لە سایەی بەردەوامبوونی هەرێمی كوردستان لەسەر جێبەجێ نەكردنی پابەندییە داراییەكانی لە پاڵ بەرزو نزمی لە نرخی نەوت و قەرزە كەڵەكەبووەكانی سەر حكومەتی فیدراڵی، ئامادەكردنی خشتەكانی بودجە هیچ سودێكی نییە.