به‌رهه‌مهێنانی نه‌وت له‌ دوو كێڵگه‌ی دیكه‌ی نه‌وت له‌ هه‌رێم ده‌ستی پێ كرده‌وه‌

دوای ئه‌وه‌ی مانگی ڕابردوو كێڵگه‌ نه‌وتییه‌كانی هه‌رێم به‌ درۆن كرایه‌ ئامانج، دووباره‌ به‌رهه‌مهێنانی نه‌وت له‌ كێڵگه‌ی تاوكێ  و پێشخاپوور ده‌ستپێكرده‌وه‌ و توركیاش ڕه‌زامه‌ندی ده‌ربڕیوه‌ له‌سه‌ر هه‌نارده‌كردنه‌وه‌ی نه‌وتی هه‌رێم.

كۆمپانیای دی ئێن ئۆی نه‌رویجی ئاشكرایكرد، به‌رهه‌مهێنانی نه‌وتیان له‌ هه‌ردوو كێڵگه‌ی فیشخابور و تاوكێ ده‌ستپێكردووه‌ته‌وه‌، داهاتیشیان له‌ چاره‌كی دووه‌می ئه‌مساڵدا به‌ رێژه‌ی 37% زیادیكردووه‌.
 كۆمپانیای دی ئێن ئۆی نه‌وت و غازی نه‌رویجی له‌ راپۆرتێكدا بڵاویكرده‌وه‌، داهاتی به‌رهه‌مهێنانی نه‌وت له‌ چاره‌كی دووه‌می  ئه‌مساڵدا به‌راورد به‌ چاره‌كی یه‌كه‌م به‌ رێژه‌ی له‌ 37% زیادیكردووه‌ و گه‌یشتوه‌ته‌وه‌، 258 ملیۆن دۆلار.
قه‌باره‌ی به‌رهه‌مهێنانی نه‌وت له‌ چاره‌كی دووه‌می ئه‌مساڵدا به‌پێی راپۆرته‌كه‌ی كۆمپانیای دی ئێن ئۆ، له‌ هه‌ر دوو كێڵگه‌دا به‌ تێكڕا گه‌یشتووه‌ته‌ 74 هه‌زار و 760 به‌رمیل نه‌وت له‌ رۆژێكدا. له‌ كاتێكدا له‌ چاره‌كی یه‌كه‌می 2025ـدا ئاستی به‌رهه‌مهێنانی كۆمپانیاكه‌ له‌ تاوكێ و پێشخابوور 82 هه‌زار و 81 به‌رمیل بووه‌.
له‌و بڕه‌، رۆژانه‌ 27 هه‌زار و 940 به‌رمیل نه‌وت له‌ كێڵگه‌ی تاوكێ و 46 هه‌زار و 820 به‌رمیلیش له‌ كێڵگه‌ی پێشابوور به‌رهه‌مهاتووه‌.
ئه‌م زانیاریانه‌ له‌ كاتێكدایه‌ كه‌ سه‌رچاوه‌یه‌كی ئاگادار له‌ وه‌زاره‌تی نه‌وتی عێراقه‌وه‌ ئاشكرایكرد كۆبوونه‌وه‌ی توركیا و عێراق له‌ باره‌ی وه‌رگرتنی نه‌وت له‌ به‌نده‌ری جیهان كۆتایی پێهاتووه‌ و ئه‌نقه‌ره‌ ڕه‌زامه‌ندی له‌سه‌ر ده‌ستپێكردنه‌وه‌ی نه‌وتی هه‌رێم نیشانداوه‌.