بەغداد پێنج ڕۆژە بڕیاری ناردنی مووچەی داوە بەڵام بەرپرسانی هەرێم بێباكن

پەیام 

ماوەی پێنج ڕۆژە ئەنجوومەنی وەزیرانی عێراق بڕیاری خەرجكردنی مووچەی مانگی شەشی فەرمانبەرانی هەرێمی داوە بەشێوەیەكی سەرەتایی و بە چەند مەرجێك، بەڵام تا ئێستا حكومەتی ماوەبەسەرچووی هەرێم بێباكە و وەڵامی ئەو مەرجانەی نەداوەتەوە.

ڕۆژی سێشەممەی ڕابردوو، ئەنجوومەنی وەزیرانی عێراق كۆبووە و تێیدا بڕیاری خەرجكردنی مووچەی مانگی شەشی فەرمانبەرانی هەرێمی بە چەند مەرجێك دەركرد، وتیشی: دەبێت ئەم مەرجانە لەماوەی هەفتەیەكدا جێبەجێ بكرێن.

مەرجەكانیش بریتین لە ڕادەستكردنی 120 ملیار داهاتی نانەوتی، چارەسەركردنی كێشەی كۆمپانیاكان و ڕادەستكردنی بەو بڕە نەوتەی ڕۆژانە لەسەری ڕێككەوتوون، لەگەڵ تەوتینی مووچەی فەرمانبەران.

بەڵام پێنج ڕۆژ بەسەر ئەو وادەیەدا تێپەڕیوە، ئەنجوومەنی وەزیرانی ماوەبەسەرچووی هەرێم تائێستا هیچ كۆبوونەوەیەكی نەكردووە، تەنانەت لێدوانێكی فەرمیشی لەسەر ئەو مەرجانە و بەردەوامیی قەیرانی مووچە نەداوە.

تەنیا ئەوە نەبێت، پێشتر پێشەوا هەورامانی وتەبێژی حكومەتی ماوەبەسەرچووی هەرێم ڕایگەیاند، 120 ملیار دینار ئامادەیە و هەركات پێویست بكات دەینێرن بۆ بەغداد.

هاوكات ڕۆژی 20ی ئەم مانگە، شاندێكی حكومەتی ماوەبەسەرچوو لەگەڵ تەیف سامی وەزیری دارایی عێراق لەسەر پرسی داهاتە نانەوتییەكان لە بەغداد كۆبووەوە، بەڵام ئەم كۆبوونەوەیەش نەبووە هۆی ئەوەی مووچەی فەرمانبەرانی هەرێم بنێردرێت.

بڕیارە هەفتەی داهاتوو شاندێكی دیكە بچێتەوە بەغداد و لەگەڵ بەرپرسانی عێراق تاووتوێی داهاتی نانەوتی و ڕادەستكردنی نەوت و تەوتینی مووچەی فەرمانبەران بكەن.

مووچەخۆرانی هەرێم مووچەی سێ مانگی ئەمساڵیان لای حكومەتە و دوایین مووچەش كە لە هەرێمی كوردستان دابەش كراوە مووچەی مانگی پێنج بووە كە ڕۆژی 25ی حەوت دەست بە دابەشكردنی كرا.