پارەى مووچەی مانگی شەشی فەرمانبەرانی هەرێم سبەینێ دەنێردرێت

پەیام

پاشئەوەى هەرێم 120 ملیار دینارەکەى ڕادەستى بەغداد کرد، پێشبینی دەکرێت سبەی یەکشەممە مووچەی مانگی شەشی فەرمانبەرانی هەرێم بنێرێت.

پاشئەوەى رۆژی پێنجشەممە 28ى 8ى 2025 حکومەتی ماوەبەسەرچووى هەرێم داهاتی ناوخۆی رادەستی بەغداد کرد، کە 120 ملیار دینار بوو، پەرلەمانتارێکى عێراق دەڵێت "سبەینێ بەغداد 950 ملیار دینار بۆ مووچەى مانگى شەشى مووچەخۆرانى هەرێم دەنێرێت".

نەرمین مەعروف ئەندامی لیژنەی دارایی لە پەرلەمانی عێراق باسی لەوەشكرد، دوای ئەوەی هەرێم بڕی 120 ملیار دیناری داهاتی نانەوتی ڕادەستی بەغداد كرد، هیچ بیانوویەك نەماوە بۆ خەرجنەكردنی مووچە بۆیە دەبێت هەرچی زووە بەغداد مووچەی مانگی شەس بنێرێت.

وتیشى "ڕۆژی پێنجشەممە بەدواداچوونم كردووە، بەڵام ڕێكارەكانی ناردنی مووچە تەواو نەكرابوو، بۆیە یەكشەممە ڕێكارەكان تەواو دەكرێت و بەغداد 950 ملیار دینار بۆ هەرێم دەنرێت، تاوەکو مووچەی مانگی شەشى پێ دابەشبکرێت".