تەرمی حەوت كۆچبەر لەلایەن تیمە فریاگوزارییە ئاوییەكانی توركیاوە دەرهێنرانەوە

پەیام 

بەهۆی ژێرئاوكەوتنی بەلەمێكی كۆچبەران لە سنوورە ئاوییەكانی توركیا، حەوت كەس گیانی لەدەستدا.

بەپێی ئامارە بەراییەكان، بەهۆی ژێرئاوكەوتنی بەلەمێك لە نزیك قەزای بۆدروم لە توركیا، حەوت كۆچبەری نایاسایی گیانیان لەدەستدا و دوو كەسی دیكەش ڕزگار كران.

دوای گەیشتنی هەواڵی ژێرئاوكەوتنی بەلەمێك لە نزیك ئۆرتاكەنت، كە كۆچبەری نایاسایی هەڵگرتبوو، لەلایەن حكومەتی ئەنقەرەوە چوار بەلەم و تیمی ژێرئاو و هێلیكۆپتەری پاسەوانی كەنار دەریا و ژمارەیەكی زۆر تیمی دیكەش ڕەوانەی ناوچەكە كران.

لە ئەنجامی هەڵمەتەكاندا دوو كۆچبەری نایاسایی، كە لە دەریادا مەترسی خنكانیان لەسەر بوو، لەلایەن هێزەكانی فەرماندەیی پاسەوانی كەنار دەریاوە ڕزگار كران.

تا ئێستا تەرمی حەوت كۆچبەر لەلایەن تیمە فریاگوزارییەكانەوە دەرهێنراونەتەوە و چاوەڕوان دەكرێت ژمارەی قوربانییەكان زیاتر بێت.