ماركۆ رۆبیۆ: ئەو هێزانەى لە غەززە جێگیردەکرێن دەبێت ئیسرائیل پەسەندى بکات

پەیام

ماركۆ رۆبیۆ، وەزیری دەرەوەی ئەمریكا رایگەیاند، كاركردن بۆ پێكهێنانی هێزێكی بیانی بۆ كەرتی غەززە بەردەوامە و دەبێت لەو وڵاتانە پێكبهێنرێت كە قەوارەی زایۆنی لە بەرامبەریان هەست بە ئارامی بكات.

رۆبیۆ، راشیگەیاند، زۆر وڵات داوایان كردووە كە لە پێكهێنانی ئەو هێزە بیانییەدا بەشدارببن، بەڵام تەنها ئەو وڵاتانە دەبنە بەشێك لەو هێزە كە ئیسرائیل پەسەندی بكات، هەروەها وتیشی، بڵاوكردنەوەی هێزەكە لە ڕێگای نەتەوە یەكگرتووەكانەوە دەبێت.

ماركۆ رۆبیۆ وتیشی، لە كۆتایی ڕێگاكەماندا ئەو هێزە لە كەرتی غەززە جێگیر دەكەین، كە ئەركی پاراستنی سەقامگیری كەرتەكە دەبێت، بە جۆرێك كە حەماس هیچ ڕۆڵێكی تێدا نەبێت.

لەبارەی ڕێكەوتنی ئاگربەستیشەوە، وەزیری دەرەوەی ئەمریكا وتی، هیچ جێگرەوەیەكی دیكە بۆ پلانەكەی سەرۆكی ئەمریكا نیە، دەبێت وەكو خۆی و قۆناغ بە قۆناغ جێبەجێ بكرێت و، لە قۆناغی ئێستاشدا تەنها چاومان لە ناردنی هاوكارییە مرۆییەكانە بۆ كەرتی غەززە و دابینكردنی پێداویستییە مرۆییەكانە بۆ دانیشتوانی كەرتەكە.