لایەنەكانی فەڵەستین لەسەر ڕاسپاردنی كۆمیتەیەكی كاتی بۆ بەڕێوەبردنی غەززە ڕێككەوتن

پەیام 

لایەنە سیاسییەكانی فەڵەستین لەسەر ڕاسپاردنی كۆمیتەیەكی كاتی كە پێك بێت لە تەكنۆكراتەكانی غەززە، بۆ بەڕێوەبەردنی ناوچەكە ڕێك كەوتن.

گرووپ و لایەنە سیاسییەكانی فەڵەستینی كە لە شاری قاهیرەی پایتەختی میسر كۆ بوونەوە، ڕێككەوتن كە بەڕێوەبردنی كەرتی غەززە بە كۆمیتەكەی كاتی لە تەكنۆكراتەكانی ناوچەكە بسپێردرێت.

لە بەیاننامەیەكی هاوبەشی ئەو گرووپانەدا كە لەم بارەیەوە ڕاگەیانراوە، هاتووە: لەسەر داهاتووی كەرتی غەززە و ڕاسپاردنی بە شێوەی كاتی بە كۆمیتەیەكی تەكنۆكراتە سەربەخۆكان ڕێك كەوتوون.

ئەو كۆمیتەیە لە ژیانی ڕۆژانەی خەڵكی غەززە و دابینكردنی پێداویستییە سەرەكییەكانی دانیشتووانی ناوچەكە بە هەماهەنگی لەگەڵ وڵاتانی عەرەبی و ڕێكخراوە نێودەوڵەتییەكان، بەرپرس دەبێت.

لە بەیاننامەكەدا باس لەوەش كراوە لایەنەكان لەسەر "كۆمیتەیەكی نێودەوڵەتی بۆ چاودێری لەسەر دابینكردنی پشتیوانییە داراییەكان و سەرلەنوێ بونیادنانەوەی غەززە، ڕێك كەوتوون".

لە بەیاننامەی گرووپ و لایەنە سیاسییەكانی غەززەدا هاتووە: ئەم كۆبوونەوانە لە درێژەی هەوڵەكانی نێوەندگیری میسر، قەتەر و توركیا بۆ كۆتاییهێنان بە هێرشەكانی داگیركەر و دۆخی مرۆیی و سیاسی غەززە بووە".