كاندیدی پۆستی سەرۆكی شارەوانیی نیویۆرك: ناسنامەی ئیسلامیی خۆم ناشارمەوە

پەیام 

كاندیدی دیموكراتەكان بۆ پۆستی سەرۆكی شارەوانی نیویۆرك، بەڵێنی دا بەردەوام بێت لە دەربڕینی ناسنامەی ئیسلامیی خۆی، ئەمەش وەك وەڵامێك بۆ هێرشە بەردەوامەكانی ئەندرۆ كۆمۆ، حاكمی پێشووی نیویۆرك و نوێنەرەكانی كە بە "ڕەگەزپەرستانە" و "بێ بنەما" ناوی بردن.

زۆهران مەمدانی لە وتەیكیدا لەبەردەم مزگەوتێك لە شاری نیویۆرك بەڵێنی دا زیاتر ناسنامەی ئیسلامی خۆی قبوڵ بكات، هەروەها وەك خۆی دەڵێت "لە سەرەتای كەمپەینەكەیدا بە ئەنقەست خۆی لە باسكردنی ئەم بابەتە بەدوور گرتبوو".

هەروەها دەڵێت: ئەوە ناگۆڕم كە كێم، یان شێوازی خواردنم، یان باوەڕەكەم كە شانازی پێوە دەكەم، بەڵام یەك شت دەگۆڕم؛ چیتر لە سێبەردا بە دوای خۆمدا ناگەڕێم و خۆم لە ڕووناكیدا دەدۆزمەوە.

هاوكات زوهران مەمدانی بە دەربڕینێكی هەستبزوێن باسی ئەو "سوكایەتیانەی" كرد كە دانیشتوانی موسڵمانی شارەكە ماوەیەكی زۆرە تووشی بوون. وتیشی: خەونی هەر موسڵمانێك ئەوەیە كە بە سادەیی وەك هەر دانیشتوویەكی دیكەی نیویۆرك مامەڵەی لەگەڵدا بكرێت.

زوهران مەمدانی كە لە هەڵبژاردنی بەراییدا لە نێو دیموكراتەكاندا سەركەوتنێكی گەورەی بەدەست هێنا، ڕووبەڕووی گومان و ڕەخنە بووەوە لەلایەن ئەندرۆ كۆمۆ و هەندێك ئەندامی دیموكراتەكان، ئەمەش لەسەر ئەوەی مەمدانی قەوارەی زایۆنی بە ئەنجامدانی كۆمەڵكوژی لە غەززە تۆمەتبار كردبوو.