ژمارەیەک لە سەرکردەکانی عێراق بۆ ھەڵبژاردنی گشتی دەنگیان دا

په‌یام

ھەریەک لە سەرۆکی ھاوپەیمانی دەوڵەتی یاسا، نوری مالیکی و ئەمینداری گشتی عەسائیبی ئەھلی حەق، قەیس خەزعەلی و سەرۆکی ھاوپەیمانی ھێزەکانی نیشتمانی، عەممار حەکیم و سەرۆکی ھاوپەیمانی سەروەریی، خەمیس خەنجەر لە بەغدا بۆ خوولی شەشەمی ھەڵبژاردنی ئەنجوومەنی نوێنەرانی عێراق، دەنگیان دا.
سەرۆکی ھاوپەیمانی دەوڵەتی یاسا، نوری مالیکی دوای دەنگدانی لە لێدوانێکی ڕۆژنامەوانییدا داوای لە دەنگدەرە عێراقییەکان کرد کە بەشدارییەکی فراوان لە ھەڵبژاردندا بکەن.
ڕاشیگەیاند کە چاوەڕان دەکەن بەشدارییەکی فراوان لە پڕۆسەی ھەڵبژاردنی خوولی شەشەمی ئەنجوومەنی نوێنەران ھەبێت و وتی: "داوای لە دەنگدەرە عێراقییەکان دەکەم کە بەشدارییەکی فراوان لە ھەڵبژاردندا بکەن و پەیامێک بنێرن بۆ ئەوانەی گرەویان لەسەر شکستی ھەڵبژاردن کردووە".
ھەر لەوبارەیەوە ئەمینداری گشتی عەسائیبی ئەھلی حەق، قەیس خەزعەلی داوای دەنگدانی لە لێدوانێکی ڕۆژنامەوانییدا ڕایگەیاند کە ھیچ شێوەیەک دەستکاریی لە ھەڵبژاردن ناکرێت، ھەروەھا دوای ھەڵبژاردنیش دەستتێوەردان لە پێکھێنانی حکوومەت ناکرێت.

ئاماژەی بەوەشدا کە ھێزە سیاسییەکان لەسەروویانەوە چوارچێوەی ھەماھەنگی، ھیچ دەستێوەردانێکی دەرەکی قبوڵ ناکەن.
سەرۆکی ھاوپەیمانی ھێزەکانی نیشتمانی، عەممار حەکیم دوای دەنگدانی لە لێدوانێکی ڕۆژنامەوانیید رایگەیاند، ئەمڕۆ رۆژێکی مێژوویی و چارەنووسسازە بۆ عێراقییەکان و ئەم ھەڵبژاردنە دەبێتە مایەی سەقامگیریی بۆ عێراق.

ھەروەھا داوای لە دەنگدەران کرد کە بەشدارییەکی فراوانی ھەڵبژاردن بکەن و وتی: "گرنگی ھەڵبژاردن ئەوەیە کە بۆ چوار ساڵ دەبێت، بۆیە بەشداری دەنگدەران زۆر گرنگە".