10/11/2025
547 جار خوێنراوەتەوە
كۆمسیۆن: دەنگدان تا كاتژمێر شەشی ئێوارەیە و یەك خولەك درێژ ناكرێتەوە
پەیام
وتەبێژی كۆمسیۆنی باڵای سەربەخۆی هەڵبژاردنەكان ڕایدەگەیەنێت، كاتی هەڵبژاردن دیاریكراوە و درێژ ناكرێتەوە.
جومانە غەلای بە پەیامی ڕاگەیاند: سبەی دەنگدانی گشتی بۆ هەڵبژاردنی ئەنجوومەنی نوێنەرانی عێراق بەڕێوە دەچێت و زیاتر لە 20 ملیۆن كەس مافی بەشداریكردنی لە هەڵبژاردنەكە هەیە، تەواوی بنكەكانی دەنگدان لەڕووی ئاسایشەوە پارێزراون و كامێرای چاودێرییش لە تەواوی وێستگەكان دانراوە.
وتەبێژی كۆمسیۆن جەختیشی كردەوە: سبەی كاتژمێر حەوتی بەیانی دەنگدان دەست پێ دەكات و لە كاتژمێر شەشی ئێوارە كۆتایی دێت، تەنانەت یەك خولەكیش هەڵبژاردن درێژ ناكرێتەوە.
جومانە غەلای ئاماژەی بەوەش دا، زیاتر لە هەزار چاودێری نێودەوڵەتی و چەندین ڕێكخراوی ناوخۆیی چاودێریی پرۆسەی هەڵبژاردن دەكەن، ڕاشیگەیاندووە: دوای 24 كاتژمێر لە دەنگدانی گشتی، كۆمسیۆن ئەنجامی بەرایی هەردوو هەڵبژاردنی تایبەت و گشتی بڵاو دەكاتەوە.
لە تۆڕە کۆمەڵایەتیەکان شەیری بکە