10 ساڵ بەسەر برِیاری شوومی حکومەتی هەرێم بۆ پاشەکەوتی مووچەدا تێدەپەرِێت

10 ساڵ بەسەر برِیاری شوومی حکومەتی هەرێمی کوردستان بۆ پاشەکەوتی مووچەدا تێدەپەرِێت. لەو کاتەوە تا ئێستا 44 مووچە بە پاشەکەوت و لێبرِینەوە دابەش کرا و 18 مووچەش بە تەواوەتی نەدراوە.

ساڵی 2015 و لەگەڵ دەستپێکردنی شەرِی داعشدا، کابینەی هەشتەمی حکومەتی هەرێمی کوردستان بەهۆی ئەوەی بە سەربەخۆ نەوتی دەفرۆشت رِایگەیاند کە تووشی قەیرانی دارایی بووە، هەر بۆیە مووچەی مانگەکانی 9 و 10 و 11 و 12 نەدرا و پاشەکەوت کرا. لە 3ی 2 ی 2016یش ئەنجوومەنی وەزیران بە فەرمی برِیاری پاشەکەوتی مووچەی دەرکرد. بەو هۆیەشەوە لە 133 مانگی رِابردوودا، نزیکەی 25 ترلیۆن دیناری فەرمانبەران لای حکومەتە.

لە کابینەی هەشتەم و نۆیەمی حکومەتی هەرێمدا 18 مووچە بە تەواوی نەدراوە، 44 مووچەش بە لێبرِین و پاشەکەوتی زۆرەوە دابەش کراوە، واتە 62 مانگ مووچە، یان نەدراوە، یان بە کەموکورِی و پاشەکەوت و لێبرِینەوە دابەش کراوە. ئەمەش بارگرانییەکی گەورەی بۆ مووچەخۆران و تەنانەت کاسبکارانی هەرێمی کوردستایش دروست کردووە.

دژی برِیاری پاشەکەوت و لێبرِین و دابەشنەکردنی مووچە، مامۆستایان و فەرمانبەرانی هەرێمی کوردستان لە سنووری پارێزگاکانی سلێمانی و هەڵەبجە و ئیدارەکانی رِاپەرِین و گەرمیان هەزاران گرد بوونەوە و خۆپیشاندان و رِێپێوانیان رِێک خست و نارِەزاییان دەربرِی، هێزە ئۆپۆزسیۆنەکان و بەتایبەت کۆمەڵی دادگەریی کوردستان چەندین جار هەڵوێستی نواند، بەڵام تا ئێستاش، نەک چارەنووسی مووچە پاشەکەوتکراوەکان دیار نییە بەڵکو لەدوایین پێشهاتدا چارەنووسی مووچەی مانگی 11 و 12 ی ساڵی رِابردوو نادیارە و هێشتا نازانرێت مووچەی مانگی یەکی ئەمساڵیش کەی دابەش دەکرێت؟!