مەسعوود پزیشکیان: مووچەکەم تەنها هەزار دۆلارە

مەسعوود پزیشکیان سەرۆککۆماری ئێران ئاشکرای کرد کە مووچەکەی تەنها هەزار دۆلارە و ڕەخنەی توندیشی لە بەرپرسانی وڵاتەکەی گرت، کە بەهۆی بەڵێنە بێ بنەماکانیان، هاووڵاتیان بەرەو شەقام و سەرهەڵدانی ناڕەزایەتی توند هان دەدات.

مەسعوود پزیشکیان، سەرۆککۆماری ئێران، لە کۆبوونەوەیەکدا لەگەڵ چالاکوانانی ئابووری لە پارێزگای گوڵستان لە باکووری وڵاتەکەی ڕایگەیاند، کە مووچەی مانگانەکەی لە هەزار دۆلار تێپەڕ ناکات.
پزیشکیان ڕەخنەی توندی لەو بەرپرسانە گرت کە ئاستی چاوەڕوانیی هاووڵاتیان بەرز دەکەنەوە، لە کاتێکدا وڵات لە دۆخێکی ئابووریی زۆر سەختدایە.

سەرۆککۆمار ئاماژەی بە دابەزینی بەهای دراوی نیشتمانی کرد و وتی: پێشتر مووچەکانمان شەش هەزار تمەن بوو کە یەکسان بوو بە شەش هەزار دۆلار، بەڵام ئێستا وەک سەرۆککۆمار تەنها هەزار دۆلار وەردەگرم.
هەروەها جەختی کردەوە کە پەرلەمانتاران، سەرۆککۆمارەکان و پیاوانی ئاینی بە لێدوانەکانیان، کێشەی نێوان دەوڵەت و کۆمەڵگایان قووڵتر کردووەتەوە.
بە وتەی ئەو، ئەم بەڵێنە بێ بنەمایانە وا دەکات خەڵک بڕژێنە سەر شەقام و بڵێن: ئێوە سەرچاوەتان هەیە و مافەکانمان نادەن.
ئەمە لە کاتێکدایە ئێران ڕووبەڕووی قەیرانێکی توندی دارایی، هەڵئاوسانی بێوێنە و بەرزبوونەوەی ڕێژەی بێکاری بووەتەوە کە بووەتە هۆی سەرهەڵدانی ناڕەزایەتییەکی فراوانی جەماوەری لە سەرانسەری وڵاتدا.