ئه‌و كه‌شتیانه‌ی له‌ به‌نده‌ری به‌سڕه‌ به‌ ئامانج گیران نه‌وتی عێراقیان هه‌ڵگرتبوو

په‌یام
بە بەلەمێکی بۆمبڕێژکراو، کەشتییەکی دیکەی نەوتھەڵگری بیانی لە بەندەری بەسرە کرایە ئامانج و بەھۆیەوە ژمارەیەک ئەندامی تیمی ناو کەشتییەکە کوژراون و برینداربوون.
بەپێی چەند گرتەیەکی ڤیدیۆیی کە لە تۆڕە کۆمەڵایەتییەکاندا بڵاوکراونەتەوە، دەردەکەوێت کە بەلەمێکی بۆمبڕێژکراو بە کەشتییەکی نەوت ھەڵگری بیانی لە نزیک بەندەری بەسرە تەقیوەتەوە.
ھەر وەک لە گرتە ڤیدیۆییەکاندا دەبیندرێت بەھۆی تەقینەوەکە، ئاگرێکی گەورە لە کەشتییەکە کەوتووەتەوە.
ھەروەھا بەپێی زانیارییەکان، بەھۆی تەقینەوەکە ژمارەیەک ئەندامی تیمی ناو کەشتییەکە کوژراون و برینداربوون.
لە ماوەی چەند کاتژمێری ڕابردوودا، ئەمە سێیەم کەشتی نەوت ھەڵگری بیانییە کە لە نزیک بەندەری بەسرە بکرێنە ئامانج.

پێشتریش دوو تەقینەوەی گەورە لە دوو کەشتی نەوت ھەڵگری بیانی لە نزیک بەندەری بەسرە ڕوویاندابوو بەھۆیەوە زیانێکی زۆری ماددی بەر کەشتییەکان کەوتوون.
تا ئێستا ھیچ لایەنێک بەرپرسیارێتی خۆی لە بە ئامانگرتنی ئەو کەشتییانە ڕانەگەیاندووە.
ھەروەھا تا ئێستا ناسنامەی کەشتییەکان نەزاندراوە، بەڵام باس لەوە دەکرێت کە کەشتییەکان سووتەمەنی عێراقیان ھەڵگرتبوو.
ھاوکات بەڕێوەبەری گشتی بەندەرەکانی عێراق، فەرحان فەرتوسی لە ڕاگەیاندراوێکدا ئاماژەی بەوەداوە، تیمەکانیان سەرجەم ئەندامانی تیمەکانی ناو ئەو دوو کەشتییە نەوت ھەڵگرە بیانیانەیان ڕزگارکردووە کە لە نزیک بەندەری بەسرە تەقینەوە تیایاندا ڕوویدابوو.