مەكتەبی زانایانی كۆمەڵی دادگەری پیرۆزبایی دەزگای زانایانی یەكگرتووی ئیسلامی پێگەیشت

پەیام

مەكتەبی زانایانی كۆمەڵی دادگەری پێشوازی لە وەفدێكی دەزگای زانایانی یەكگرتووی ئیسلامیی كوردستان كرد، كە بەمەبەستی پیرۆزبایی بەبۆنەی گۆڕانكارییەكان و دەستبەكاربوونی بەرپرسی نوێ، سەردانی مەكتەبی زانایانی كۆمەڵی دادگەرییان كردبوو.

وەفدی میوان كە پێكهاتبوو لە مامۆستا جەعفەر ئەڵماس بەرپرسی دەزگای زانایانی یەكگرتووی ئیسلامی و ژمارەیەك لە كارگێڕانی دەزگا، لەلایەن دكتۆر یاسین حەسەن، بەرپرسی مەكتەبی زانایانی كۆمەڵی دادگەری و ژمارەیەك لە كارگێڕانی مەكتەبەوە پێشوازییان لێ كرا.

لەو دیدارەدا وێڕای پیرۆزبایی دەستبەكاربوونی بەرپرس و كارگێڕانی نوێی مەكتەبی زانایانی كۆمەڵی دادگەری، هەردوولا گفتوگۆ و باسوخواسیان لەسەر پەرەپێدانی پەیوەندییە دووقۆڵییەكان و هەماهەنگیی زیاتری نێوانیان كرد.

هەروەك ڕەوشی بانگەواز و هۆشیاریی ئیسلامی بەگشتی خرایە بەر باس، لەو بارەیەوە هەردوولا كۆك بوون لەسەر یەكخستنی هەوڵ و تواناكان بۆ زیاتر برەودان بە كاری بانگەواز و فراوانكردنی بازنەی هۆشیاریی ئیسلامی و بڵاوكردنەوەی زانستی شەرعی، ئەمەش وەك ئەركی هەرە لەپێشی زانایانی كۆمەڵ و یەكگرتوو.