لیستی مووچەی مانگی 9ی فەرمانبەرانی هەرێم سبەی رادەستی عێراق دەکرێت

پەیام 

بڕیارە سبەی 3ی 10ی 2026 لیستی مووچەی مانگی 9 ی فەرمانبەرانی هەرێم و تەرازووی پێداچوونەوەی مانگی 8 رادەستی وەزارەتی دارایی عێراق بکرێت، بەهۆی نەبوونی کێشەی نەختینەش، پێشبینی دەکرێت دوای تەواوبوونی وردبینییەکان راستەوخۆ پارەکە خەرج بکرێت.

لە دوای وەرگرتنی، وەزارەتی دارایی عێراق راستەوخۆ دەست بە پرۆسەی وردبینی لە لیستەکەدا دەکات و چاوەڕوان دەکرێت لە ماوەی چەند رۆژێکدا وردبینییەکان لە لیستی مووچەی مانگی 9ی فەرمانبەرانی هەرێم کۆتاییان بێت.

پرۆسەی تەمویلکردنی مووچەی فەرمانبەرانی وەزارەتەکانی عێراق بەهۆی پشووەکانەوە راگیرابوو، بەڵام پێش پشووەکە بەشێکی زۆری وەزارەتەکان مووچەکانیان وەرگرتبوو. هەروەها بەراورد بە مانگی رابردوو، عێراق لەم مانگەدا کێشەی نەختینەی کەمترە و پارەی پێویستی لەبەردەستدایە، بۆیە بەهۆی زوو دەستپێکردنی دابەشکردنی مووچە لە عێراق، پێشبینی دەکرێت راستەوخۆ دوای وردبینی، تەمویلی مووچەی هەرێمی کوردستان بکرێت.

مانگی ڕابردوو لە ڕۆژی 14ی 9ی 2026، وەزارەتی دارایی عێراق بڕی 831 ملیار و 666 ملیۆن دیناری وەک شایستەی مووچەی مانگی 8ـی فەرمانبەران و مووچەخۆرانی هەرێمی کوردستان خستە سەر هەژماری بانکیی وەزارەتی دارایی حکوومەتی هەرێمی کوردستان.