1 کاتژمێر پێش ئێستا
46 جار خوێنراوەتەوە
توركیا و عێراق كار بۆ ڕێككەوتنێكی هەمەلایەنە و درێژخایەنی وزە دەكەن
پەیام
توركیا و عێراق بۆ زیادكردنی هەناردەی نەوت و وەك جێگرەوەی گەرووی هورمز، هێڵی كەركووك-جەیهان بۆ بەسرە درێژ دەكەنەوە.
ئەلب ئەرسەلان بەیرەقدار، وەزیری وزەی توركیا، لە میانی كۆبوونەوەیەكیدا لەگەڵ باسم محەمەد خزێر، وەزیری نەوتی عێراق لە ئەنقەرە، ڕایگەیاند: درێژكردنەوەی هێڵی نەوتی كەركووك-جەیهان بۆ بەسرە و زیادكردنی توانای گواستنەوەی، هەنگاوێكی ستراتیژییە بۆ ئەوەی ببێتە جێگرەوەیەكی بەهێز بۆ ناوچەی كەنداو و گەرووی هورمز.
بەپێی بەیاننامەی وەزارەتی وزەی توركیا، هەر دوو وڵات كار بۆ داڕشتنی نەخشەڕێگەیەكی نوێ بۆ ڕێككەوتنێكی هەمەلایەنە و درێژخایەنی وزە دەكەن كە ئامانجی سەرەكی گەیشتنە بە هەناردەكردنی یەك ملیۆن بەرمیل نەوت لە ڕۆژێكدا، بە مەبەستی ئەوەی بەندەری جیهان ببێت بە ناوەندێكی جیهانیی وزە.
هەروەها هەردوو وڵات تیمێكی هاوبەش بۆ پەرەپێدانی ژێرخانی نەوت، غاز، كارەبا و پەترۆكیمیایی پێك دەهێنن.
ئەمەو هێڵی كەركووك-جەیهان هێڵێكی بۆرییە كە كێڵگە نەوتییەكانی كەركووك بە بەندەری جەیهانی توركی لەسەر دەریای سپی ناوەڕاست دەبەستێتەوە كە درێژایی نزیكەی 970 كیلۆمەترە و لە مانگی ئابیشدا ڕێككەوتنێكی ساڵانە بۆ گواستنەوەی 750 هەزار بەرمیل نەوت لە ڕۆژێكدا ئیمزا كرابوو.
لە تۆڕە کۆمەڵایەتیەکان شەیری بکە