وتەبێژی كۆمەڵ هۆشداری لە دروستكردنی جەنگێكی تایفی لە ناوچەكە دەدات

پەیام

وتەبێژی كۆمەڵی دادگەریی كوردستان هۆشداری دەدات لە هەوڵەكان بۆ دروستكردنی شەڕی تائیفی لە ناوچەكەدا. 

محەمەد حەكیم ڕایگەیاند كە شەڕی تائیفی نەخشەی ئەمریكا و زایۆنیزمە بۆ پارچەپارچەكردنی پێكهاتەكان و مەشغوڵكردنیان بە یەكترەوە، ئەمەش بە ئامانجی كردنەوەی بازاڕ بۆ فرۆشتنی چەكەكانیان.

ئاماژەی بەوەشكرد، دەبێت وڵاتانی وەك توركیا، ئێران و سعوودیە بە ئاگاییەكی زۆرترەوە مامەڵە بكەن. ئەم وڵاتانە ئەركێكی مێژووییان لەسەرە تا ڕێگری بكەن لە گۆڕینی ململانێی نێوان ئێران و ئەمریكا بۆ شەڕێكی مەزهەبی، چونكە ئەوە ئامانجی بنەڕەتی نەخشەی ئەمریكا و زایۆنیزمە بۆ تێكدانی سەقامگیری ناوچەكە.


سەبارەت بە كێشەی یەمەن، وتەبێژەكە ڕوونیكردەوە كە ناكرێت تەنها وەك كێشەی ناوخۆیی یان ڕەفتاری حوسییەكان سەیر بكرێت. بەڵكو دەبێت وەك بەشێك لە هاوكێشە جیوپۆلۆتیكییە گەورەكە و ململانێ نێودەوڵەتییەكان شیكاری بۆ بكرێت.

داواشی كرد خوێندنەوەی قووڵ بۆ ڕووداوەكان بكرێت و لە شیكاری ڕووكەشانە دوور بكەونەوە.