ئۆپێک پڵەس لەسەر هێشتنەوەی ئاستی بەرهەمهێنانی نەوت وەک خۆی ڕێککەوت

هاوپەیمانیی ئۆپێک پڵەس لە کۆبوونەوەی ئەمڕۆ یەکشەممەیدا، لەسەر هێشتنەوەی ئاستی بەرهەمهێنانی نەوتی خاو وەک خۆی و بەبێ دەستکاری بە شێوەیەکی بنەڕەتی ڕێککەوت. 
بەپێی زانیارییەکانی ئاژانسی ڕۆیتەرز، کۆبوونەوەکە بە بەشداریی حەوت ئەندامی سەرەکی لەوانە عەرەبستانی سعوودی، ڕووسیا، عێراق، کوێت، جەزائیر، کازاخستان و عومان بەڕێوەچوو، کە تێیدا بڕیار درا ئاستی بەرهەمهێنان بۆ مانگی تشرینی یەکەم جێگیر بکرێت. ئەم بڕیارە دوای ئەوە دێت کە ئۆپێک پڵەس لە مانگی ئەیلوولدا پرۆسەی هەڵوەشاندنەوەی کەمکردنەوەی ئارەزوومەندانەی نزیکەی یەک ملیۆن و ٦٥٠ هەزار بەرمیلی ڕۆژانەی تەواو کرد کە لە ساڵی ٢٠٢٣ەوە دەستی پێ کردبوو، هەرچەندە لە ئێستادا زۆربەی بەرهەمهێنەران بەهۆی ئاستەنگە تەکنیکییەکانەوە کەمتر لە پشکی دیاریکراوی خۆیان نەوت دەردەهێنن. 
هاوکات دوو سەرچاوەی ئاگادار ئاشکرایان کرد کە هاوپەیمانێتییەکە پلانی پێداچوونەوە بە پشکی وڵاتانی ئەندامی بۆ ساڵی ٢٠٢٧ دواخستووە، بەهۆی ئەوەی جەنگی ئەمریکا و ئیسرائیل دژ بە ئێران کاریگەریی نەرێنی لەسەر پڕۆژەکانی پەرەپێدانی کێڵگە نەوتییەکان لە ڕۆژهەڵاتی ناوەڕاست دروست کردووە. ئەم ڕێککەوتنەی ئۆپێک پڵەس لە کاتێکدایە کە وڵاتانی کەنداو هەوڵ دەدەن هەناردەی نەوتی خۆیان زیاد بکەن دوای مانگانێک لە پەککەوتنی گواستنەوەی دەریایی، تا ئارامی و هاوسەنگی بۆ بازاڕەکانی وزەی جیهان بگەڕێننەوە.