شاندێکی هەرێمی کوردستان بۆ پرسی بودجە و نەوت دەچێتە بەغدا

پەیام
بڕیارە لە چەند ڕۆژی داهاتوودا شاندێکی باڵای حکومەتی هەرێمی کوردستان بۆ تاوتوێکردنی کێشەکانی پڕۆژەیاسای بودجەی ۲۰۲۷ سەردانی بەغدا بکات و لەگەڵ وەزیری دارایی فیدراڵ کۆ ببێتەوە. 
سەرچاوە ئاگادارەکان ئاماژە بەوە دەکەن کە پشکی هەرێمی کوردستان لە سەرووی ئەو تەوەرانەیە کە ناکۆکی لەسەرە بەجۆرێک هەولێر داوای تەرخانکردنی ڕێژەی ١٤ لەسەد دەکات و بۆ ئەوەش ئەنجامەکانی سەرژمێریی گشتی کردووە بە پێوەر، لە کاتێکدا بەغدا ڕێژەی ١٢ لەسەدی دیاریکردووە. 
هاوکات پرسی هەناردەکردنەوەی نەوتیش یەکلایی نەکراوەتەوە و؛ حکومەتی فیدراڵ داوای ڕادەستکردنی ڕۆژانە ٤۰۰ بۆ ۵۰۰ هەزار بەرمیل نەوت دەکات، لە کاتێکدا پێشنیازی هەرێمی کوردستان بریتییە لە ڕادەستکردنی ۲۵۰ بۆ ۲۸۰ هەزار بەرمیل نەوتی ڕۆژانە. 
پێشبینی دەکرێت لەم کۆبوونەوانەدا دۆسیەی داهاتە نانەوتییەکان، میتۆدەکانی بەڕێوەبردن، کۆکردنەوە و ڕادەستکردنیان بە حکومەتی فیدراڵ بخرێنە بەر باس، بە مەبەستی گەیشتن بە لێکتێگەیشتنی کۆتایی پێش ڕەوانەکردنی پڕۆژەیاساکە بۆ ئەنجومەنی نوێنەران.