نەخۆشخانەى هیوا لە یەک ڕۆژدا دوو هەزار و ٣٠٠ پشکنین ئەنجامدەدات

پەیام – هاوکار جەزا

بەڕێوەبەرى نەخۆشخانەى هیوا لە شارى سلێمانى ئاشکراى دەکات گرفتى دارایى نەبووتە هۆى لاوازبوونى خزمەتگوزارییەکانیان و توانیوانە لە یەک ڕۆژدا "٢١"توشبووى نوێى شێرپەنجە تۆمار بکەن و دوو هەزار و ٣٠٠ پشکنین ئەنجامبدەن.

دکتۆر یاد نەقشبەندى بەڕێوەبەرى نەخۆشخانەى هیوا دەڵێت:"سەرەڕای هەموو ئەو گرفتە داراییانەی کە هەیە و لە ئێستادا پشووی فەرمیە لە سەرجەم فەرمانگەکانی حکومەتی هەرێم کوردستان بەڵام نەخۆشخانەی هیوا بریاری دابوو کە (29/30/12/2024) بکاتە دەوامی فەرمی بۆ ئەوەی زۆرترین خزمەت بە تووشبوانی شێرپەنجە بگەیەنێت."

بەڕێوەبەرى نەخۆشخانە جەختى کردەوە: "ئێمە هێشتا توانیومانە خزمەت گوزاریەکان لە ئاستێکی باڵادا پێشکەش بە تووشبوانی شێرپەنجە بکەین  و گرفتە دارایەکان نەبوونەتە  هۆی لاواز بونی خزمەت گوزاریەکانمان لەسەر ئاستی عێراق و ناوچەکە."

دکتۆر یاد نەقشبەندى ئامارى یەک ڕۆژى (یەکشەممە 29/12/2024)ى نەخۆشخانەى هیواى  ئاشکراکد و بە گوێرەى داتاکان، تەنها لە یەک ڕۆژدا "21" توشبووى نوێى شێرپەنجە تۆمارکراون، ئەمە سەرەڕاى پشکنین و چارەسەرى سەدان نەخۆشتى دیکە.

داتاکانى دیکەى نەخۆشخانەکە بریتین لە:
- 1200نەخۆش سەردانى نەخۆشخانەی هیوایان كردوە
- 2300 پشكنینی تاقیگەی جۆراوجۆر بۆ نەخۆش ئەنجام دراوە
- 740 نەخۆش سەردانی دەرمانخانەیان کردوە دەرمانیان وەرگرتوە
-83 نەخۆش پشكنینی تیشك و سۆنەر و ئیكۆیان بۆ کراوە
- 150 نەخۆش چارەسەری کیمیاییان وەرگرتوە 52 نەخۆش چارەسەری ڕۆژانەیان وەرگرتوە
- 75 نەخۆش لە بەشی فریا کەوتنی خێرا داغڵ بون
- 83 نەخۆش لە قاوشە جیا جیاکانی نەخۆشخانە داغڵ کراون و چارەسەری پێویستیان وەرگرتوە
- 10 نەخۆش پشکنینی مۆخی ئێسک
- لەسەنتەری چاندنی مۆخی ئێسک  5 نەخۆش سەردانی کردوە لەهەمان کاتدا 15نەخۆش چارەسەری ددانیان بۆ ئەنجام دراوە

دکتۆر یاد نەقشبەندى سوپاسى پزیشک و کارمەندانى نەخۆشخانەکە دەکات و دەڵێت:"هەمیشە خەمخۆرو پاڵپشت بوونە بۆ چارەسەری نەخۆشانمان."

هیوا نەخۆشخانەیەکى تایبەتە بە چارەسەرکردنى توشبووانى شێرپەنجە و تاکە نەخۆشخانەیە لە سنوورى پارێزگاى سلێمانى، هەڵەبجە و ئیدارە سەربەخۆکانى ڕاپەڕین و گەریمان. بە گوێرەى داتاکان یەکێکە لەو نەخۆشخانانەى لەسەر ئاستى عێراق زۆرترین چارەخوازیى هەیە و بە کوالێتییەکى بەرز چارەسەر پێشکەشدەکات.