لیڤەرکوزن شوێنی ئالۆنسۆ بە ڕاهێنەرێکی دیار و گەورە پڕ دەکاتەوە

پەیام سپۆڕت - مەڕوان تاڵیب

ئێرک تێن هاگی هۆڵەندی و ڕاهێنەری پێشووی مانچستەر یونایتد ڕوو لە بایەر لیڤەرکوزن دەکات و شوێنی چابی ئالۆنسۆ دەگرێتەوە.

 ڕۆژنامەنووسی ئیتاڵی فابریزیۆ ڕۆمانۆ ئاشکرای کردووە، بەرپرسانی لیڤەرکوزن بە مەبەستی هێنانی ڕاهێنەری نوێ پێشکەوتنی زۆر باشیان بەدەست هێناوە و لەگەڵ تێن هاگ گەیشتوونەتە ڕێککەوتن و وەرزی داهاتوو شوێنی ئالۆنسۆ دەگرێتەوە پاش ئەوەی بڕیاری ڕۆیشتنی لە یانەکە داوە.

ڕاهێنەرە هۆڵەندییەکە هەموو داواکارییەکانی خۆی خستووەتە بەردەم یانە ئەڵمانییەکە و بە ڕێژەیەکی زۆریش وەرزی نوێ سەرکردایەتی لیڤەرکوزن دەکات.

ساڵی ڕابردوو تێن هاگ بەهۆی ئەنجامە خراپەکانییەوە لە مانچستەر یونایتد دوورخرایەوە، پاش ئەوەی لە 128 یاریدا سەرکردایەتی یانەکەی کرد و 72 بردنەوە و 20 یەکسانبوون و 36 شکستی تۆمار کرد و نازناوی جامی یەکێتی ئینگلتەرا و جامی یانە پیشەگەرەکانی دەستەبەر کرد.