پلانی یاریکردنی ئانچلۆتی لەگەڵ بەڕازیل ئاشکرا دەبێت

پەیام سپۆڕت - بڕیار تەها

پلانی یاریکردنی کارلۆ ئانچلۆتی لەگەڵ هەڵبژاردەی بەڕازیل ئاشکرا دەبێت.

 ئانچلۆتی ئیتاڵی هەفتەی ڕابردوو بە فەرمی وەک ڕاهێنەری نوێی هەڵبژاردەی بەڕازیل دەستبەکار بوو.

ڕۆژنامەی گڵۆب سپۆرتی بەڕازیلی ئاشکرای دەکات، ئانچلۆتی پلانی هەیە بۆ یەکەم یاریی بەڕازیل بەرانبەر ئیکوادۆر بە داڕشتەی 4-3-3 یاری بکات، واتا چوار بەرگریکار و سێ ناوەند و سێ هێرشبەر لە پێکهاتەکەدا دەبن.

سەرچاوەکە ئەوەشی ئاشکرا کردووە، بەڵام کاتێک بەڕازیل تۆپ لەدەست دەدات، ئانچلۆتی پلانی داناوە داڕشتەکەی بۆ 4-4-2 بگۆڕیت و یەکێک لە هێرشبەرەکان بگەڕێتەوە بۆ نێو هێڵی ناوەند.

بەرەبەیانی هەینی لە کاتژمیر 2:00 هەڵبژاردەی بەڕازیل دەبێتە میوانی هەڵبژاردەی ئیکوادۆر، لە ڕۆژی 11ی ئەم مانگەشدا بەڕازیل لەسەر خاکی خۆی پێشوازی لە پاراگوایی دەکات.